قصص من الواقع

أجينا من وكت قبل الموعد أني و بنتي .. قصص من الواقع

أجينا من وكت قبل الموعد أني و بنتي … بنتي عدها مراجعة علمود سنونها و جيت وياها .. بصالة الانتظار الي بداخل العيادة اكو شباك عالشارع ..

يعني من الشباك نكدر نشوف الناس الي بالشارع بس من فوك داخل العيادة أني وبنتي .. الجو جان طبيعي بس السكرتيرة بداخل العيادة راحت تفتح الشباك .

. (علمود تغيير التيار الهوائي يعني) .. من فتحته طلع صوت الشباك و طبعا هو مرتب على الطراز الحديث ..

الصوت مال الشباك نقلني من مكان لمكان .. تذكرت صوت الشباك الي بالصالة مالتنا ..

جان صوت الشباك وصوت السكة الحديد مال البردة يرعبنا اني و اخوتي .. لأن معناها راح ننكتل ..

جنا عايشين بمشتمل طابق ثاني .. المشتمل كله صالة و غرفة نوم .. وعدنا حمام هو حمام و هو تواليت (مكرم القارئ) و مطبخ صغيروني ..

غرفة النوم ابوية و امي ينامون بيها .. و الصالة احنا الجهال ننام بيها .. لعبنا و دراستنه و حجينه كله بهل الصالة ..

ممنوع ننزل نلعب برى البيت لان ابونه ميقبل .. و فوك هالشي اذا نلعب بالصالة و نطلع صوت وهو نايم بالغرفة يطلع تقريبا بالاسبوع ٣ مرات تتكرر الحالة يطلع يكتلنه كلنه ..

جان اول ميطلع ميحجي ولا كلمة و أمي المسكينه رأسا من تشوف شكله مبين معصب كبل تروح للمطبخ تسوي نفسها تشتغل بس هي جانت تبجي بالمطبخ متشتغل .. هي تخاف تصير بينا و بينه لان يكتلها الها هم ..

جانت تنهزم ..هو أول ميطلع من الغرفة يجي أول شي يسوي يسد الشباك .. الشباك جان حديد و بي صوت مال الحديد من يزنجر من المطر ..

صوت الشباك جان يحك الكلب حك .. يسده و بعدين يجر البردة المفتوحه .. السكة مال البردة جانت حديد و هم صوتها يخوف من تنجر ..

احنا بهل الاجزاء مال الثانية رأسا نكوم نبجي تلاثتنه .. لان نعرف راح ننكتل ..و نروح كل واحد بمكان .. الي يكعد عالتخم ..

والي يوكف يم الحايط (يعني ينطي ظهره للحايط و يرجع ايدناته ليورى) و الي يكعد بالكاع .. كلنا ننتظر الضرب ..

بس الحلو بالموضوع (بابا مجان يفرق بيناتنه) جان كلنه يكتلنه نفس الكتل .. يدفرنا برجله .. راشديات .. كفخ .. شيل و شمر عالكاع ..

ميفرق .. ابونه جان كلش عادل بكتلنه .. ابونه عادل لدرجة الزراك الي بجسمنه ميروح ..

لان مستحيل يمر اسبوع اذا مننكتل .. و كلنه بينا هالزراك .. و طبعا من كثر الكتل الي اصلا احنا مظلومين بي …

تعلمنه نصير هادئين .. بس مرات جنا نحجي بيناتنا .. نكول اذا هو ميقبل نطلع صوت هنا بالصالة ليش ميخلينه نطلع برى نلعب و نطلع صوتنه برى و نجي نكعد عقال هنا ..

بس مجان اكو جواب لهل السوال .. قانون ابوية لازم يمشي علينه .. و لازم نبقى بهل الصالة .. و يوم ورى يوم تعلمنه منلعب ..

جهال نخاف من اللعب .. اني الي اعرفه الجهال يخافون من السعلوه من العجوز ام وجه المحروك من الذيب الي لحك ليلى ..

من السحارة .. بس احنا نخاف من اللعب .. والله جنا نخاف من اللعب .. و كبرنا و احنا على هالحطة .. احنا بنات ثنين و اخ واحد ..

اخونه الصغير و اني الجبيرة و اختي الوسطانية الي اصغر مني .. تقريبا صرنا معقدات اني واختي ..

و تعلمنه يوم ورى يوم نصير مثل امنه .. اخونه بعمر صغير كام يشتغل وي ابونه و طبعا من كبرنا مكدرنا نكمل دراسة بسبب ابونه …

حدنا للثالث متوسط و نبطل و نكعد ننتظر (رجال) أي رجال يتزوجنه و يدللنه ..

و عادي حتى لو يطلع مثل ابونه هم لازم نسكت و نتحمل حالنه حال منو (دقيقه اني منو شايفه تتحمل كل شي) اهااا امنا مثل امنا نصير ..

نسكت و نتحمل و شعرنا يصير ابيض كطن مو من العمر لااااا من القهر .. و هذا الي صار بالضبط .. اتزوجت رجال مختاريته ولا حتى شفته ..

مجرد ابوية اجه للبيت و كال لامي رتبيها لبنتج ههههههههه .. رتبتني امي .. عدلتني .. طلعتني بمظهر لائق للزواج ..

و علمتني اهم قانون بهل الدنيا (قانون كولي أي) قانون كولي أي حتى لو اعرفه غلطان حتى لو يغلط بحقي أكول أي ..

و اخذت هالوراثه وياي و رحت لبيت اهله لرجلي .. رحت واني شايله بجنطتي كلمة (أي) ..

و دخلت بهل البيت الي بي ٣ شباب و بنات ثنين و امهم وابوهم .. عائلة عبارة عن مشاكل ..

ميمر يوم اذا متصير عركة بيناتهم .. عالصينية يتعاركون .. عالشغل مال بيت يتعاركون ..

على اسخف الاشياء يتعاركون .. يعني كلاص المي هم يتعاركون عليه شلون (مثلا واحد يدز اخته تجيب كلاص مي) شوية تتأخر ..

خلص صارت عركة و كفران و غلط و سب و شتم بالقلم العريض .. عشت ببيت اهلي من يوم ولادتي لحد يوم مجيت لهنا والله مسمعت كلمات (قبيحة) ابد ببيتنا ..

حتى كلت بيني و بين نفسي هسه اني اذا اخلف هنا معقولة ابني راح يطلع هيج لسانه زفر (مكرم القارئ) .. و طبعا مرت الايام و سنه جرت سنه و ماكو حمل .. ما حملت ..

و كل متمر سنه سوء التعامل من زوجي يزيد .. بالبداية جان ضرب خفيف و بعدين كام يضربني قوي ولا مرة رحت لأهلي كلتلهم زوجي كتلني مع العلم همه يمنا بنفس المنطقة ..

لان اني جيت متدربة .. شلون الجنود الي يطلعوهم بالافلام من يدربوهم بالضرب حتى يتحملون اذا تأسرو لو دخلو بأشتباك ..

اني جيت حاضره .. عالعموم .. أم زوجي كامت تلح على سالفة التحاليل .. و هو طبعا رجال ميقبل يروح يحلل لان اكيد العيب مني مو منه ..

و طلع العيب مني .. انفصلت (تطلكت) لان عائلة البساط الاحمر .. عائلة نابليون بونبارت يريدون حفيد (سليل العائلة المالكه) يريدون طفل يربوه عالتقاليد الحلوة ..

عالكلام المهذب .. عالعموم .. تطلكت و رجعت لبيت اهلي … و طبعا الحلو بالموضوع اني اتحاسب و اسمع حجي من ابويه على شي مو بيدي …

شكد صعبة من البشر يتحاسب على مرضه او على خلل بجسمه هو ممختاره .. بس سبحان الله ..

تزوج طليقي ورى فترة و هم مصار عنده اطفال و من راح حلل هم طلع عنده خلل .. يعني الصوج مجان بس بيا .. بي هم …

و بقيت بالبيت و طبعا وراها بفترة تحولنه لبيت ثاني لان اني واختي بنات و ميصير نبقى ننام بالصالة طول العمر ..

و أجرنه بيت بي ٣ غرف .. و طبعا جانت الوضعيه المادية شوية متحسنه بسبب شغل اخويه .. كعدنا اني واختي بغرفه ..

لان اختي جانت بذاك الوقت بعدها ممتزوجه .. و اخويه بغرفه وابوية و امي بغرفه ..

بذاك الوكت اني قررت اشتغل و طبعا ابوية لأول مرة ميعترض على هالشي ليش ؟؟ لان عرف اني خلص راح ابقى يمه طول العمر ..

رأسا تخلى عن تقاليدة و قبل بالواقع .. اشتغلت بالشركة العامة للغزل و النسيج .. عاملة .. جنت اصغر وحدة بالقسم كله ..

كلهم نسوان كبار بس اني صغيره .. حتى مره اكو مرية رادت تزوجني لأبنها متدري اني منفصلة و ما يصير عندي اطفال اصلا ..

حجيتلها كل شي جان تشيل الفكرة من راسها و راحت طبعا حجت لكل النسوان بالمعمل ..

هواي بيهم انقهرو عليا لان ببداية حياتي و بعدني شابه و حياتي تخربطت من بدايتها ..

حتى مرة وحدة منهم تقربت مني هي مرية جبيرة .. كامت تحجيلي على ماضيها وخطية هم بجت لان تعذبت هواي بحياتها ..

اني من حجيتلها على ابوية شلون يعاملنه و شلون زوجني غصبا ما عليا و هيج صار وياي كامت تبجي ..

كالت تدرين قبل ما اعرفج جنت اتوقع اني اكثر وحدة مظلومة .. بس انتي بهل العمر وهيج صاير بيج ..

بلكي المستقبل احسن .. كلتلها خاله فدوة اروحلج المستقبل خلي نقربه .. مثلا هسه مستقبل اي بنية شنو ..

لو تتزوج لو تنجح بحياتها .. اني زواج ميرهملي و النجاح هم ميرهملي .. قابلة بحياتي هيج و شيصير خلي يصير ..

و بقيت فترة اشتغل بهل المعمل وفد يوم اخوية اجاني للمعمل من وقت .. تفاجأت من شفته برى .. كالي بابا توفى .. بجيت ..

بجيت رغم ما هو مأذيني و مأذي امي واخويه بجيت و حتى اخويه بجى .. و رجعنا للبيت و سوينا الفاتحة و راح ابونه ..

بقينا بالبيت بدون أب .. بس حياتنا تغيرت جذريا .. كما نضحك هواي لان هو حتى الضحك بدون سبب جان يرزلنه عليه ..

كمنا نطلع سوى حتى اخوية الي هو رجال شفنا بي شخصية ثانية .. كام يطلعنه دائما و دائما متونسين …

و جان دائما يحاول يغير الموضوع اذا حجينا بالماضي .. و دائما جانت امي تكول الراح راح لا تظلون تعيديون بي ..

و لو هالشي مستحيل ينسي لان الانسان عبارة عن حاضر و ماضي .. الحاضر هو اليوم الي نعيشه و الماضي هي تراكمات الذكريات و التجارب الي عشناها ..

بس كمنا نتناسي مو ننسى .. و بيوم من الايام جتني بنية بمنطقتنا الي جنا كاعدين بيها .. هي تعرفني اصلا (يعني معرفة جوارين) و تعرف مقتطفات من قصتي ..

يعني سالفة اني اتزوجت و اتطلقت لان ميصير عندي اطفال .. وهالحجي امي حاجيته لامها ..

كالتلي شنو رأيج عندي فكرة مشروع نشتغله اني وياج و خاله فلانه .. فلانه هي هم جوارينه ..

رجلها هم متوفي و عدها بس بنات ٢ و البنات ثنينهم متزوجات .. وهي وحدها كاعده بالبيت ..

كلتلها شنو المشروع ؟ كالت خاله فلانه كالت شوفي بعد بنيه وياج ثقه و تكون مودبه و محترمة و تعالو ببيتي خلي نسوي شي مثل الحضانه بس هو مو حضانه مرخصه من الحكومة (يعني شغله بيناتنه وبس) ..

يعني ببساطة .. اكو ناس عدهم جهال صغار يريدون يطلعون وحدهم لو مثلا موظفات لو معلمات ..

يخلون جهالهم يمنا بهل البيت مال (خاله فلانه) واني وهالبنية نداريهم و طبعا بأشراف الخاله .. و ناخذ هالقاسمة الله .. بس قبلها نكول هالحجي للجوارين حتى ناس تكول لناس ..

كلتلها ياريت لان قريبه على بيتنا و شغله حلوه و اني اصلا احب الجهال .. طبعا اني مفتهمت هي ليش اختارتني لحد ما التقيت بصاحبة الفكرة الرئيسية .. المرية الجبير الي نصيحلها خاله ..

هي رايدة هيج وحدة لأن تعرف الي ميصير عدها اطفال شلون تتشوق لتربية الاطفال و راح تكون اكثر وحدة حنينه بتعاملها وياهم ..

و رحت و التقيت بالمرية طبعا اني شايفتها قبل بحكم هي بالمنطقة بس مممتعرفه عليها تعارف كامل .. يعني مجرد سلام ..

و حجتلي ليش اختارتني وطلعت هي دازه عليا هالبنية جوارينه .. و بدينا بالموضوع .. و سبحان الله بس بدينا بالشغله الناس كلها حبت الموضوع و كامو يخلون يمنا جهالهم و حتى اكو اطفال صغار كلش هم جنا نرعاهم ..

و انعرفنه بالمنطقة .. و شغلنه صار كلش زين و الراتب الي جنت احصله من هالشغلة اكثر بهواي من شغلتني بالغزل و النسيج ..

و بيوم من الايام .. خلصت شغل و دارجع للبيت المرية الجبيرة كالتي اكلج عندي حجي وياج .. كلتلها هسه .. كالت لا ورى مياخذون الناس جهالهم .. كلتلها زين ..

و اجوي الناس اخذو جهالهم و بقينا بس اني وياها و البنية الي جتني بأول مره .. كالتلي تعرفين شهد .. كلتلها اي اعرفها … هي طفله بعمر ٣ سنوات تقريبا …

طبعا اني ما اعرف اهلها منو .. بس اعرف شهد و اعرف كل اسامي الجهال مو بس هي .. كالت ام شهد متوفيه و ابوها عايش .. و ماعرف بصراحة شلون توفت والدتها بس الي اعرفه هي الوحيدة لأبوها ..

والدها الله مفضل عليه و امكانيته زينه .. و هو هم ترى من منطقتنا بس ماعندهم علاقات وي الناس .. امه عايشه بس جبيرة كلش .. ما بيها حيل تمشي المسكينه ..

هو ميأمن على بنته يم احد غريب .. قبل مجان يجيبها يمنا جانت تبقى يم امه .. بس امه مثل مكلت كلش جبيرة متكدر عالبنية وحدها و انتي بعينج دشوفين شهد كلش حركه و وكحه ..

و بصراحة من الاخير هو شافج هنا اكثر من مره من يجي ياخذ بنته .. و حاجاني و طبعا هو عباله انتي بنتي .. بس كلتله هي اكثر من بنتي ..

و حجيتله قصتج و لو اعتذر لان هالشي مو من حقي بس الولد لان سمعت طلبه كلت خلي اكله كل شي يخصج ..

الولد يريد يتزوجج .. و طبعا كلتله هي عدها مشكله بسالفة الانجاب .. و قبل .. و ينتظر رد أولي منج حتى يتقدم و يروح لأهلج .. كلتلها لا اسفه ماريد .. اني ما اتزوج بعد .. كالت بكيفج .. و سديت الموضوع ..

و راها بأربع ايام طلب ابو شهد يحجي وياي .. بعد ما سمع جوابي .. كالها بس اريد احجي وياها بأي مكان تختاره .. كلتله ماشي خلي يجي لبيت اهلي وهناك يحجي وياي ..

و رحت حجيت لأمي و لأخوية كالو مدام الرجال نيته شريفه خلي يجي هلا بي ..

و اجه لبيتنا و طبعا شهد وياه .. اني الكعده كلها شهد بحضني كاعده لان متعلمة عليا يوميا يجيبها يمنا …

كالي يابنت العالم كبال اهلج احجي هالحجي .. اني رايدج بالحلال .. وكل شروطج اقبل بيها ليكدام .. و اذا بيوم اذيتج تكدرين تطلبين طلاق .. و طبعا المرحومة ام شهد بيوم ولادتها متوفيه و هو بقى بدون زواج ٣ سنوات لان يخاف على بنته لا ياخذله وحده تأذيها ..

و من شافني هيج اعاملها و من سمع سالفتني من خاله تمسك بيا اكثر .. و كال جملة هي الي خلتني اقبل لان شفته صريح .. كال مستحيل الي مثلج تأذي طفله .. و اني لو عليا ما اتزوج ورى ام شهد للموت والله ..

بس امي متكدر وحدها على شهد و اني عندي رزقي و شغلي و كعدت فترات طويلة علمود ابقى بس اربي شهد والحمدلله انتو سويتو هالشغله شوية اخذت نفسي و رجعت لشغلي بفضلكم .. وافقت و تزوجته بس شرطت عليه ابقى بشغلي ..

كالي يا عيني اني من البداية كلتلج كل شروطج اني قابل بيها ..

طبعا الرجل كلش محترم و ابن خير و امه كلش محترمه و فرق بين هالعائلة و ذيج العائلة (مال بيت طليقي) من السما للكاع ..

انتقلت وياهم و طبعا هو عنده شغل هواي الرجال و صارت عنده علاقة حلوة بأخويه و اخذ اخويه شغله وياه .. و ساعد امي و اختي هواي و حتى مره كال ليش ميجون كل اهلج يعيشون يمنا هنا البيت جبير و احنا بس ٣ نفرات ..

كلتله لا مترهم .. والله العظيم عرفت معنى الحب على ايده .. عرفت معنى شي اسمه رجل يحترم المراءة بكل شي ..

عرفت شنو معنى كلمة رجال .. لان الرجل الحقيقي طلع موجود ..

جنت فاقده الامل بعد ما شفت ابويه و طليقي الكه رجال يعاملني تعامل حلو .. بس ابو شهد خلاني احس اني عندي قيمه .. اني انسانه .. خلاني احب الحياة والله .. و شهد صارت بنتي الي ما جابتها بطني ..

و طبعا ورى كم سنه من زواجي الشغله الي جنت اشتغلها توقفت .. لان المرية كبرت كلش و راحت كعدت وي وحدة من بناتها .. و بقيت وي شهد .. بس .. هسه اذا اطلع بالشارع بمنطقتنه ..

شباب كبار لحياهم طويله و شواربهم هالثخنها من يشوفوني يكولولي هلو ماما ساره شلونج ههههههه .. احلى شعور احس بي ..

من اطلع للسوك اني و شهد و تشوفني بنيه لو ولد طبعا اكيد كبار و اعمار مختلفه بيهم حتى الي جهاله وياه لو جهالها وياها ..

رأسا يوكفون يسلمون عليا .. يعني جنت اتمنى اصير ام لطفل واحد .. صرت ام لكومة اطفال و هسه كلهم صارو رياجيل و نسوان و شهد هم كبرت حبيبتي و صارت مرية ..

و هي نفسها الي هسه وياي بالعيادة و كلت بنتي لان هي بنتي والله .. و هي اصلا متعرف أم غيري بهل الدنيا … و هسه اني عايشه بأحلى حياة وي اكثر انسان محترم ابو شهد ..

و بنتي شهودتي .. و طبعا اخوية وضعه تغير و امي الحمدلله عايشه وي اخوية لان هم تزوج .. بس ماعرف ليش ..

صوت البردة و الشباك ورى كل هالسنين و هالعمر بعد يخوفني .. يارب العباد لاتشوف احد من هالناس الي شفته بصغري و بتجربتي الاولى بزواجي .. يارب ارزق الكل بحياة بعيدة عن الخوف و الحزن .. يارب ..

انتهى (حال و حال)

الكاتب ابو بغداد

الأولى نيوز-متابعة

https://m.facebook.com/www.awla.news/

مقالات ذات صلة

اترك تعليقاً

زر الذهاب إلى الأعلى