قصص من الواقع

اكو رجال ويانه بالدائرة موظف … هالرجال كلش مرتب فوك التوقعات ..

اكو رجال ويانه بالدائرة موظف … هالرجال كلش مرتب فوك التوقعات .. يعني يختار كل شي وي لون ملابسه .. حتى الڤيب الي يدخن بيها اختارها وي لون ملابسه .. و مستعد يروح لابعد منطقة علمود شيشة ريحة لو قميص لو بنطرون … الولد حلو طول و جسمه كلش مرتب .. حتى شعره و لحيته كله عالموديل و رغم ما عمره جبير حاليا و ولده بطوله بس البنات الي بالوظيفة و حتى المراجعات يباوعون عليه و حتى وصلت بيهم الدرجة يسألوه انته متزوج لو لا .. و هالسوال ماكو بنيه تسأله لولد اذا ممهتمه بي .. طبعا هو صديقي و عندي وياه ميانه .. اني كل فترة دوامي وياه جنت اتوقعه ابو علاقات و بنات .. لان لسانه حلو بالحجي و دائما هواي امور تتسهله بسبب شكله و طريقة كلامة و لبسه … اني من صرت وياه ميانه كلش قوية .. اكتشفت هالرجال بعيد كل البعد عن العلاقات وي البنات .. شفته كلش مهتم بعائلته و كلش يحب زوجته .. تعجبت بصراحة .. و سألته كلتله اكلك اني و كل الي بالدائرة بالبداية من داومت ويانه عبالنه انته تدور صداقات و بنات .. بس طلعت ابيض .. كل شي ماكو .. ضحك كالي هالصورة مو بس انتو ماخذيها عني .. حتى كرايبي نفس الشي .. بس اني جنت هيج فترة طويله و اذا احجيلك قصتي والله متصدك .. كلتله شلون يعني .. كال اني من صف ثالث متوسط هيج .. يعني من عمري جان صغير واني احب اللبس و الكشخه … توقع جنت اشتغل عامل بمحل مال تصليح تلفزيونات و الاسبوعية مالتي اجمعها حتى بنهاية الشهر اشتريلي قطعة ملابس اصلية (ماركه) و جنت اتمنى اسوي علاقة وي بنيه .. كلتله شنوووو .. كال اي والله .. مو كلتلك اذا احجيلك مراح تصدكني ..توقع اني مريت بمواقف محد يصدك بيها .. بس هالحجي قديم .. لحد عمر ٣٣ سنة اني ممريت بعلاقة والله العظيم .. و بعمر ٣٣ تزوجت .. كلتله احجيلي .. كال راح احجيلك كم موقف .. اول موقف مريت بي بصف رابع اعدادي .. رحت للزوراء ادور على وحدة اصادقها .. بشرفك شايف هيج غباء .. يعني اكو وحدة تروح للزوراء اذا مو وياها عائلتها لو صديقها لو خطيبها لو حبيبها .. اني رحت و كل توقعاتي راح انسق هناك .. امشي و ادور على وحدة تمشي وحدها لو واكفه وحدها .. لكيت وحده كاعدة على مصطبه .. رحت وكفت كبالها و بقيت احجي وياها بس مكعدت .. كلتلها اريد اكعد يم الگمر ممكن .. ساكته و تباوع عليا .. كلتلها اني اكدر هسه اكعد بدون موافقتج بس اني ما اسويها .. واعرف گلبج طيب و راح تكولين اكعد و راح تسأليني عن حياتي و راح احجيلج كل شي عن حياتي و راح انتي تطلبين رقمي لان انعجبتي بيا .. هالحجي كله هي تباوع عليا .. طبعا اني ثقي بنفسي جانت فووول .. لان اني من ذاك الوقت جنت مرتب و معتني بروحي .. هي كطعت كلامي و كالت باع وراك .. درت وجهي جان اشوف ثنين رياجيل وطفله صغيرة .. بس قريبين مني كلش يعني حتى لو ردت اطفر ما الحك .. تقربو مني كالو تفضل .. كلتلهم جنت اسأل الاخت وين اكو مطعم قريب لان جوعان (يعني حتى مكدرت ادارك الموقف من رهبة الوضع) و حتى جذبتي جانت مو مقعنه .. سأل زوجته كالها صدك .. هي ضحكت كالتله اي صدك .. لو مضاحكه هواي احسن لان ضحكتها جانت سبب حتى انكفخ .. لان شك الرجال بكلامي .. من انكفخت اعترفت رأسا و اعتذرت .. انوب هالمره رجلها مضربني الي وي رجلها دفرني كالي يله لك فر ويلك منا .. (جملة فر ويلك لاخواتنه الي ميعرفوها معناها ولي منا و هالجملة جاي من مصطلح ويل و الويل هو الحديدة الي الدائرية مال تاير السيارة يعني فر تايرك) عفتهم رأسا و انهزمت .. بس دعيت عالبنية و دعيت عالرياجيل ثنينهم .. دعيت عالمرية لان مكالت ولي وبقت ساكته من جنت احاول انسق وياها .. لو كايلتلي اني متزوجة جان فريت ويلي و ولييييت .. و الدعوى الثانية عالرياجيل لان بالجذب جان بقى واحد يم البنيه و واحد راح .. ليش ثنينهم عايفيها و رايحين .. يمكن رايحين يشترون شي للطفله لو رايحين يودوها لحمام .. ليششش مبقى واحد يمها .. لو باقي واحد جان مسويت هالشي و كملت طريقي و ما حصلت كفخه و دفره .. هذا اول موقف بحياتي .. وراها بفترة ما بطلت .. جنت صاعد بكوستر و بصفي بنيه .. البنيه جانت كلش حلوة و انيقة .. اني وياها و رياجيل ثنين كاعدين بأخر خانه ..هي بصف الشباك و اني بصفها و بصفي ثنين رياجيل .. الطريق كله ادعي ينزلون هالاثنين حتى ابدي احجي وياها .. ونزلو و بقيت بس اني وياها بالخانه الورى .. عاد انطلقت بالحجي بس بصوت ناصي لان اكو ناس بالكوستر بس بالكراسي الي كبالنه .. كمت احاول اقنعها تاخذ رقمي و احجي على جمالها و ريحة عطرها .. اشو هاي بدون سابق انذار و بدون حتى ما نوهت عن الي راح تسوي .. صاحت بصوت عالي انته متستحي .. كلمة متستحي لوحدها جانت كفيله اني شبعت كفخات بلحظتها .. لان كلمة ما تستحي جانت مبهمه و بيها ايحاء يخوف .. يعني الي سمع الكلمة من العبريه حقه يضربني .. لان ميعرفون اني شسويت ميدرون اني جنت بس احجي .. طبعا ابو الكوستر وكف و حتى هو نزل كفخني و فوكاها نزلوني من الكوستر .. اني بس نزلت ركضت … طبيت بفروع و جانت الدنيا ظهريه … وراها رجعت عالشارع العام وجان رايح ابو الكوستر .. هسه لهنا ماشي و اني انهانيت عادي بس المصيبه وين .. المصيبه بالكروه .. اني جانت الكروه خمسين دينار وهي اخر خمسين دينار بجيبي .. ودكيت مشي من منطقة لمنطقة .. بحيث وصلت للبيت نمت نومه عميقة لدرجة لا غداء اكلت ولا حتى عشاء .. كعدت ساعة اربعه الصبح و رحت عالجدوره الي عالطباخ ادور بقايا اكل .. و هالموقف هم انتهى .. زين .. عرس اخو صديقي .. العرس مسوينه بقاعه .. رحت اني و طبعا كل اصدقائي ولد منطقتي هم جايين .. العرس جوي بي بنات اكثر من الولد والله العظيم … كل اصدقائي وزعو ارقام تلفوناتهم و صادقو .. اني من جيت انطي رقمي لبنيه ابوها جان مراقب بنته و عينه عليها .. و من شافني لحكتها و هي موووووووافقه قابله تاخذ رقمي .. طلعت برى القاعة وهي طلعت وياي .. ما حسيت الا ابوها فوك راسنه .. طبعا ضربها كالها فوتي جوى و حاول يلزمني بس الحمدلله هالمره كدرت انهزم .. ملزمني .. ركضت بالشارع بس تعرضت للأصابه .. الاصابه مجانت بسبب ضرب .. الاصابه جانت بسبب الحذاء (مكرم القارئ) .. بذاك الوقت اكو احذيه جانت روغان هاي بس للحفلات نلبسها وي السيت القماش .. يعني اذا قميص قماش و بنطرون قماش ميكعد وياه بس الروغان ابو لمعه .. زين الشارع گير .. واني اركض بحذاء روغان .. تزحلت بنص الشارع و مع الاسف بنطروني انشك و ركبات رجلي انجرحو ثنينهم .. واخذت تكسي و رجعت للبيت .. و ثاني يوم جنت كلش خايف لا ابو البنية سأل اصدقائي بالعرس و راح تصيرلي مشكله بس الحمدلله مصار شي .. و من حجيت هالحجي لاصدقائي كامو يضحكون عليا .. وحتى كالو جملة ما انساها .. لو عدنا لبسك و شكلك وطولك .. منوزع ارقام ننتظر هي الارقام تجينه .. كلتلهم وييييييين .. راح اموت و بعدني ممصادق .. و هم هالموقف راح و انتهى … و بالسوك مره لحكت بنيه .. هي وامها .. البنيه جانت تباوع عليا و تبتسم .. هم محظر رقمي و ردت انطيها الرقم .. مكدرت انطيها الرقم بالسوك لان مدخلت هي وامها بنص هوسة بشر .. يعني كل مشيها بمناطق ما بيها هوسة .. اخر شي كلت هالبنيه معجبة بيا خلي اصير قريب منها و ااشرلها بالرقم .. جنت مستقتل عالسالفة .. لان كلت هالمره غير كل المرات .. هالمره البنيه وحدها وي امها .. رجال ماكو وياها .. يعني كل الظروف زينه … و تقربت منها بشارع بي محلين بس .. اشرتلها و هي اشرتلي يعني جيب الرقمه جيبه .. تقربت جان امها تشوفني .. شعبالها امها عبالها حرامي و اريد ابوك جنطة بنتها .. صاحت حرامي هي صاحت حرامي من الفزه الي فزيتها صدك حسيت روحي حرامي .. يعني من باب ما اكدر اكلها اريد انطي رقمي لبنتج و من باب ثاني ماكدر اكلها مو حرامي لان صرت قريب كلش عليهم .. ركضت و واحد ابن خوش ناس من اهل المحلات صار عداء رياضي براسي .. يابه اركض كل سرعتي وهو ورايه .. و طبيت بدربونه جان اوكف تعبت لزمني .. كلتله بس خلي افهمك و جان اطلع الرقم بيدي كلتله عمي ردت انطيها الرقم والله .. ضحك و كالي تعبتني .. اني بالكوه اجر النفس وهو يجر النفس بالشافعات .. كالي تعرف ليش لحكتك لان قبل كم يوم واحد باك جنتطة زوجة اخويه هم هنا بالمنطقة .. كلت بلكي نفسك .. جان عدمتك والله .. و رزلني رزالة بأدب و راح .. كالي بابا انته ماعندك خوات و كام يحجيلي عالشرف و عالغيره .. بس ما ضربني الحمدلله .. و من وراها قررت ابطل هالشي لان كلت كل مره دتصادفني مشكله ممكتوبتلي احب و انحب و اعيش دور العاشق .. بس هم ما بطلت .. كمت هالمره اجرب عالتلفون الارضي اسوي علاقة .. و اكو وحده بقيت وياها شهرين احجي وياها و الرقم بوقتها دكيته لا عالتعيين حالي حال اغلب الشباب بذاك الزمن الي يدكون ارقام عامي شامي .. و شهرين اني اتوسل بصاحبة الرقم بس نلتقي .. و اخير شي من وافقت رحت .. تواعدنه يم مطعم معروف كلش ببغداد .. هي كالتلي راح البس فلان لبس و اني هم كلتلها راح البس هيج لبس .. طبعا هي كل فترة العلاقة تكلي اني عمري اكبر منك و اني جنت ما اهتم لهل الحجي لان بس ردت اچلب بعلاقة .. و رحت و هي تأخرت .. جتي شفتها من بعيد و انهزمت لان بصراحة انقهرت على نفسي .. جبيرة بكد امي و الي خبلني شلون جان صوتها ناعم كل فترة الشهرين ماعرف .. هسه اني لو سائلها شكد عمرج جان متعبتها خطية .. والله انقهرت عليها .. بس مترهم جبيرة كلش و مو سالفة شكل والله العظيم .. يعني لو صغيرة بعمري وي شكلها هذا ماعندي مشكله .. بس جبيرة جبيرة .. انهزمت بس ضميري حاجاني ..كالي عيب و خطية على الاقل ارجع كلها مترهم سالفتنه لو ابقى وياها و بعدين قلل اتصالك .. رجعت .. سلمت عليها وهي سلمت عليا .. كالت متوقعتك هلكد صغير .. كلت بكلبي همزين جتي من عدها مو من عندي .. كلتلها اي و كمت بس احجي عالعمر حتى افهمها اني زعطوط .. و عزمتها بمطعم و اكلنه و ضحكنه شويه بس هي كالت و الحمدلله مثل مكلت جتي منها مو مني .. كالت احنا نبقى اصدقاء احلى و نبقى على تواصل بس مال علاقة مترهم .. و لاتنسى انته لحيت هواي بموضوع نتشاوف .. طبعا ردت اكوم ابوس ايدها من كالت هيج .. كيفت .. كلتلها صح و اني اعتذر تعبتج كل هالمدة .. كالت لا بالعكس اني كسبتك صديق واخ .. من كالت اخ .. كلمة اخ من سمعتها ردت اكوم ادور وين اكو محل مال طبل و موسيقى اجيبهم يدكون يم بالمطعم .. و انتهى اللقاء و رجعت للبيت مرتااااح لان مكسرت كلبها للبنيه مادري للمريه مادري لخاله .. بس بقيت اخابرها اسلم عليها بين فتره و فتره بعدين انكطعت عنها و راحت لحال سبيلها .. و هم صارت حالات بعد كومه .. طبعا لهنا اني كطعت كلامه .. كلتله زين انته شلون تزوجت لعد ؟؟؟ كال زواجي لا على البال و لا عالخاطر .. أمي الله ينطيها الصحه ماكو مرض بهل الدنيا مصاير بيها .. سكر على ضغط على رجليناتها على ظهرها على عيونها على گلبها .. و كل متاكل شي تكوم توهوس .. ضغطي صعد .. سكري صعد .. ضغطي هابط .. سكري هابط .. عيوني مغوشه .. و رأسا حتى ترتاح اخويه الاصغر مني يوديها لمضمد بمنطقتنه حتى يقيسلها الضغط … هي نفسيا بس تروحله ترجع بحيلها .. تمشي وحدها بدون متنسد على اخويه لو تلزم ايده … يعني بالروحه شكل و بالرجعه من المضمد شكل ثاني .. ترجع بحيلها عبالك جون سينا … بس من تروح بالكوى تمشي و تكول ما اشوف زين .. طبعا فد يوم رايحه و جان المضمد مموجود .. طابه جوى لبيت المضمد و اخويه باقي برى .. منو موجود جوى بنته للمضمد و امها .. بنت المضمد تعرف كل شي و تضرب حتى ابر للنسوان .. قايسه ضغطها و مريحتها بحجيها .. امي حابتها .. رجعت تحجيلي عنها و هالحجي كله اني ماعرف الفلم شنو …. تحجيلي عن جمالها و عن رقتها و عن شكلها .. تكلي تشبه ايمان الطوخي .. حتى بوقتها مجانت تعرف اسم ايمان الطوخي جانت تكلي هاي الي يحبها الجاسوس رأفت الهجان .. اني على حجي امي حبيتها للبنيه و بعدني مشايفها .. كمت اتخيل شكلها بيني و بين نفسي و طبعا للأمانه همه عائلة المضمد كلش محافظين و بناتهم ابد ميطلعون برى .. كمت اتخيل شكلها و كل ميطلع فلم بي الممثله ابقى اصفن على شكلها و اعيش لحظات حب بيني و بين نفسي .. لحد ما كلت لأمي يله خلص زوجينياها لان لحت عليا بسالفة الزواج و عمرك كبر و عمرك كبر .. و شفتها .. و روح ابويه و وروح كل الماتولي لا تشبه ايمان الطوخي ولا شي .. بس امي طلعت تريد تزوجنياها ليش .. حتى تعيش وياها بالبيت و سالفة قياس الضغط و قياس السكر و هالسوالف كلها براس زوجتي هههههههههههههههه .. و تزوجتها .. البنيه دره مال الله .. حبابه و كلش خدومه .. و تفتهم هواي بمواضيع الطب .. يعني عدها شغف بهل الموضوع مع العلم هي مخلصه اعدادية و مبطله بس تحب تقرأ .. زوجتي مو احلى مريه بالكون و لا تشبه ايمان الطوخي بس حبيتها .. حبيتها لدرجة ماكدر اباوع على وحده غيرها .. و المصيبة العظمى .. ورى زواجي بشهر والله العظيم شهر مو اكثر .. عبالك بوري مال بنات انكسر عليا .. حتى وصلت بيهم الدرجة همه مرات يحاجوني .. يعني باوعت على روحي كلت وين جانوووووووو قبل الزواج .. وين .. اشو تزوجت منا صارت السالفة كلش سهله .. قبل الزواج جنت اتوسل بتراب الكاع على علاقة و اعيش قصة حب ماكو .. هسه وين ماروح اصادف وحده هي تريد تصادقني مو اني .. بس مصادقت و لا دورت خيانه على زوجتي .. ليش ؟؟ لان احبها .. حبيتها ورى الزواج .. و كل يوم يمر بزواجي احبها اكثر و اكثر و اكثر .. و تأكدت من شي .. السالفة مو بالشكل .. ولا بالصوت .. و لا حتى بالشهادة و النزاكه و الثقافة .. السالفة بالمشاعر الي تحسها من كاعد وي زوجتك او حبيبتك او صديقتك .. مرات من واحد يكعد يم شخص يحبه اكو دكه بالكلب تصير مختلفه عن دكته العاديه .. مثل الخفقان بس هو مو خفقان .. هالدكات من تجي .. معناها انته مو بس حبيتها .. انته متكدر بدونها .. و هسه دشوف … شكد تحصلي سالفة صداقة و اكو حتى موظفات بدون ذكر اسماء بيهم وحده كالتلي والله العظيم اقبل اصير ثانيه … اني كلتلها لا مترهم .. بس لو ممتزوج جان رهمت .. اني مو نبي و لا ملاك و لا معصوم .. بس احب زوجتي .. و هاللبس الي البسه و الترتيب مو علمود اجذب انتباه احد .. بس اني احب اللبس و هالشي ما اتوقع غلط .. بس الغلط من الناس تفتهمني غلط .. ليش عود اغلب الموظفين عبالهم اني لان هيج معتني بلبسي اني ابو نسوان و علاقات .. ليش .. و هاي قصتي و هاي سالفتي ياخويه .. طبعا من كمل كلامه ضحكت و كلتله زين اخر سوال .. كالي اسأل ؟؟ كلتله زين هم صادفك موقف انته و زوجتك طالعين و وحده تندك بيك .. كال اي مره بمول اني وياها و ابني طالعين .. دنشتري شغلات و الي دتبيع ماعرف صاحبه المحل بقت تباوع عليا و زوجتي حست بيها .. متحملت زوجتي كالتها اخذي اذا عاجبج شبيج اكلتي اكل بعيونج .. طبعا فد خجلت اني و كلتلها شبيج .. و جريتها و طلعنه برى المحل .. كلتلها بابا لا تسوين هيج .. كالت مشفتها شلون تباوع عليك .. كلتلها حبيبتي افتهمي .. انتي هسه وياي و صار الموقف .. زين اني هالمواقف تصادفني وحدي اكون (خنتج .. صادقت عليج .. دورت عليج علاقه) كالت لا .. كلتلها خلص احبج و هالشي عادي ترى .. كالت مكيف بروحك النسوان تباوع عليك .. بعد هالقميص متلبسه افتهمت .. كلتلها حرگي من نرجع للبيت ديري عليه نفط و حركي .. ضحكت هي و سدينا الموضوع .. و ارجع و اكول زوجتي ام جهالي ما ابدلها بالكون كله .. و عرفت الحب مو شرط يكون علاقة و تلفونات و رسائل .. و الارتباط هم مو هيج .. الحب و الارتباط يجيك يجيك هو من كيفه .. و حرامات تعبت روحي كل هالسنين و ترزلت و انضربت بمراهقتي .. و تاليها حب حياتي اجاني بدون ترتيب مسبق (مني) بس من امي اي .. امي خططت و رتبت هههههه بس لفائدتها .. علمود متمشي هالكم خطوى لبيت عمي (المضمد) .. اجاها المضمد للبيت و عاش وياها .. والحمدلله على كل حال .. (بنت المضمد) انتهى اخوكم ابو بغداد سايق التكسي #ابوـبغداد

مقالات ذات صلة

اترك تعليقاً

شاهد أيضاً
إغلاق
زر الذهاب إلى الأعلى