الاهل مدرسة

اكو بنية تجي بين فترة و فترة تاخذ علاج مني … البنية بنهاية العشرينات … حلوة و حبابة و اسلوبها كلش راقي بالتعامل و بسيطة جدا … العلاج جان للامراض المزمنه .. يعني اكيد لأمها لو ابوها … اني جنت مفتح الصيدلية جديد بالمنطقة .. مع العلم هالمنطقة جانت منطقتي قبل منتحول لغير مكان اني و امي … و رجعت هسه بالجديد لهل المنطقة فتحت الصيدلية و اخذنا بيت هنا اني و امي و اخوتي .. اني الجبير بالبيت بين اخوتي … و عندي حاليا بس امي و عندي اباء ثنين ههههههه … واحد عايش و الثاني ميت .. العايش هو ابوية الي خلفني .. و طبعا عنده حياته و عنده عائلته … الميت هو الاب الي رباني و جان زوج أمي .. و ابو اخوتي الي حاليا وياي ..
المهم .. هالبنية مره جتي تطير مثل الحمامة داير مداير الصيدلية .. تريد تفوت و متفوت .. عرفت هالشي و حسيت بي و اني الي طلعتلها كلتلها خير اكو شي شبيج .. كالت والله مستحيه اكلك .. كلتلها دتفضلي جوى بالبداية .. فاتت و كالت ماعرف شحجي .. اقسم بالله العظيم حسيت هي تريد العلاج و مستحيه لان ماعدها فلوس .. رحت رأسا حضرت العلاج لان مو بس اني اي ابو صيدلية بالدنيا اذا شخص يتردد عليه فترة ياخذ منه علاج معين يبقى براسه و يعرفه خصوصا اذا علاج للامراض المزمنه .. رحت اخذت العلاج و انطيته الها .. خجلت البنيه كلش و كالت والله الراتب تأخر هالشهر بس ينزل انطيك .. كلتلها يمعوده صدك جذب لاتحجين هيج … و راحت .. وصدك ورى كم يوم جتي جابت الفلوس .. بيومها جان ماكو احد بالصيدلية حجيت وياها .. سألتها وين تداوم .. كالت اني خريجة بس ممتعينه و جنت اشتغل ادرس جهال المنطقة و اخذ هالقاسمة الله بس هسه وكف الشغل .. كلتلها ليش انتي خريجة تربية .. كالت لا اني قانون بس تعلمت التدريس من ماما لان ماما جانت معلمة .. كلتلها هااا حلو .. و من يومها كامت كل متجي نسولف حتى مرات جنت احس هي تأخر روحها اذا اكو ناس بالصيدلية حتى نسولف .. طلبت رقمها .. و بديت احجي وياها يوميا … امها جنت اسمع صوتها مرات طبعا مبينه عراكه و ام مشاكل رغم ما هي جبيرة و جانت هواي تسألها ويامن دتلغين هههه مو دتحجين ويامن دتلغين ..
و البنية جان تنطيها اسماء بنات .. عالعموم .. حبيت البنيه .. و انقهرت على وضعها .. و يوم ورى يوم كمت اتعلق بيها ازيد … و فد يوم سألتني كالت اكلك صدك انته مو جنت كاعد هنا قبل .. كلتلها اي .. كالت بيا ابتدائية جنت .. كلتلها اسم الابتدائية جان تكول جذذذذذذذب .. كلتلها ليش ؟؟
كالت امي جانت بيها معلمة … ضحكت اني .. كلتلها بس انصحج نصيحه لله لا تكولين لأمج على اسمي .. كالت ليش .. كلتلها بكيفج اني نصحتج … جان تكول الا اكولها .. كلتلها بكيفج و شسوت .. بقت الموبايل مفتوح و اني اسمع الصوت .. جان تروح لامها كالتها ماما اريد اسألج على طالب و اريد اشوف ذاكرتج مو تكولين ذاكرتي حديديه و كل الطلاب اعرفهم واتذكرهم … كالتلها اي .. كالتلها اكو بنية صديقتي متقدملها ولد جانو كاعدين هنا و كايللها هو جان يداوم بنفس الابتدائية الي انتي تدرسين بيها .. اسمه فلان فلان .. جان تكول عووووذه هاي منين طلعلها اكيد جان بالسجن وطلع و يريد يتزوج كوليلها ديربالج تاخذي .. اني خربت من الضحك بس البنيه انصدمت .. و سألت امها واني داسمع .. كالتلها ليش ماما شجان يسوي .. كالتلها جان يبوك شمعات المدرسة و مره لكفته ست شذى ديبوكها …. خطية عافت جنطتها بغرفة المعلمات و هو شاف الجنطة من الشباك و فات يكلب بيها و لكفته و كتلته و مرة باك صونده جديدة و الفراشة شافته .. و جنت يوميا اكول للمدير فصله بس جان ميفصله .. بس يكتله وكل خميس بل اصطفاف يطلعه يكتله كبال المدرسه كلها وهم ميتوب … و اني شخصيا سوى وياي شغله متتسولف .. مره دامشي بالممر و شمر عليا طين على تنورتي من ورى .. و عرفته هو بس الجهال جانو يخافون منه و محد كال عليه .. بس اني متاكده هو و دزيت عليه و حلف مو هو كالعاده .. و جان يكسر جام المدرسة .. جان مخبل و لا عبالك عمرة صغير .. مو طفل جان حرامي و هسه اكيد صار انكس ..
و البنيه كالت لامها كافي كافي استحت لان تعرف اني داسمع الصوت .. و رجعت تحجي وياي .. كالت هاي صدوووووك .. كلتلها انتي مسألتيني شي عن الماضي و اني عرفت امج … بس خلي احجيلج مدام انفتح الموضوع … كالت احجي …
طبعا بوكتها جنت صف ثالث ابتدائي .. جنت واعي على الي يصير داير مدايري … بيت جدي ابو ابوية و بيت جدي ابو امي ثنينهم كاعدين بالشعب و جانو جوارين بنفس الشارع .. ابوية شغله جان بالمشتل و علمود هالشي انتقلنه هنا … للأسف ابوية جانت علاقته بأمي مو علاقة رجال و مرته … علاقته بأمي كله صياح و غلط …لدرجة اني توقعت هي هاي حياة كل الناس المتزوجين .. و تعلمت من ابوية كلمات جنت ما اكولها كدامه بس كبال الجهال و بالمدرسة استخدمهم … لساني جان نكس (مكرم القارئ) .. يعني اسب و اغلط .. و من احد يرجع يجاوبني بغلط اضربه و اتعارك مع العلم اني الي بديت بس هم اتعارك .. و امي تكول لابوية و ابوية يذب الصوج بيها يكلها تربيتج وهالشي صاير مثل الفلم او المسلسل الي الواحد يشوفه اكثر من مره وحافظ احداثة حدث حدث … اني هيج جنت اعرف الاحداث و حافظهم و يوميا اشوف نفس التفاصيل .. و طبعا ابوية جان يضرب … بأي شي يضرب .. كلاص يمه لو ماعون لو خشبة لو حذاء (مكرم القارئ) يضرب .. و ميحدد مكان للضرب .. كلش عادي بالوجه يضرب .. و هالحجي بالبداية جان بس الي .. بعدين كام يضرب امي .. و لحد هسه اتذكر شلون الجوارين تلتم ورى كل عركة بالباب من ورى صياح امي .. المصيبة و الطامه الكبرى .. مرات اسمع انو الرجل الي يشرب لو يتعاطى حبوب لو عنده علاقة مو شرعية لو يلعب قمار لو لو لو .. هذا ميكون زين وي زوجته و جهاله .. بس ابوية جان كل هالسوالف ماعنده .. لا يشرب لا يلعب شي ولا حتى يصادق .. و حتى مرات جان يصلي بس مرات مو دائما .. و من بدت سالفة الضرب بأمي على اسباب تافهه .. اني شخصيتي تغيرت كلش .. كمت اسوي اشياء مجنت متوقع ابد اسويها … بداية الاشياء هو التكسير .. جنت احب اكسر جام المدرسة و الصفوف .. و كلش عادي انلزم و انكتل و اترزل .. و يسوولي استدعاء ولي امر وتجي امي .. المدير مال الابتدائيه جان بيتهم قريب من بيتنا .. و يعرف وضع البيت مخربط وينقهر عليا و ميفصلني بس جان يكتلني .. بالخشبه .. و اني الكتل مثل الثلج على صدري لان شراح يصير هالكتل ميصير مثل كتل (بابا اليا) … اكو معلمة جانت تكرهني كلش .. هي معاونه شغلتها ادارية .. بس جانت تسمع شكاوي المعلمات عليا و على تصرفاتي .. المعلمة هاي هي امج … جنت كل ما اسوي شي غلط هي تجي للادارة تكله للمدير فصله خلي يولي هالجلب (مكرم القارئ) .. و حتى مرة صح ضربتها بالطين .. جنت شكو شي مو زين اسوي .. و ما اعرف اتحكم بتصرفاتي ..
و جنت صح ابوك مرات شغلات من المدرسة و ابيعها بسوك بغداد الجديدة مال المستعمل و بالفلوس اشتري لفات و طيور من الجنابيز مال بغداد جديدة الي يم السينما و اربي الطيور فوك السطح بعدين اضيعهم لان يروحون مني .. جنت مو صغير جنت جبير .. و جنت اكره شي اسمه حياتي .. كله من ورى ابوية … لحد صف خامس ابتدائي ..ابوية ضرب امي ضربة قوية و دمها غركنه .. و رحنا للمستشفى و اني جنت ابجي من الخوف .. تخيلت امي ماتت و ابوية راح ينعدم لان يعتبر قاتل .. بس امي عاشت و اتطلكت .. رجعنا لبيت جدي للشعب .. و ارتاحو مني المدرسة و المعلمات .. جان عدهم عيد من انتقلت و خلصو مني و من عركاتي .. وحتى جهال المنطقة و الطلاب بالمدرسة ارتاحو مني .. انتقلت لمدرسة ثانية .. بالمدرسة الثانية هم بديت اسوي نفس سوالفي الي جنت اسويها قبل .. و ورى فترة رجعت للبيت سمعت اكو رجال متقدم لأمي و يريد يتزوجها لان امي جانت بعدها صغيرونه و حلوة … و اتزوجها واخذني وياها .. جنت اكرهه .. اتخبل منه ..
بس هو جان يحاول يرضيني بكل الطرق .. اصعب وكت عليا من جان يجي الليل و امي تروح وياه للغرفة … صح هو متزوجها و حلاله هي بس اني جنت اغار على امي .. مو بيدي هذا تفكيري بذاك العمر .. الرجال جان يجيبلي اشياء احلم امتلكها .. حببني بي بالكوه .. حبيته و حسيته صدك مثل الاب … جان يخاف عليا ومدللني .. حبيته و بديت اتعدل بالسلوك .. يوم ورى يوم اني تغيرت كمت احب الدراسة و كمت احترم .. و احلى يوم بحياتي من امي حملت و عرفت راح يصير عندي اخ لو اخت .. و تغيرت جذريا .. كمت احترم الكل .. و كلامي صار موزون .. و رغباتي صارت مختلفة .. و سنه تجر سنه دخلت متوسطة و اعدادية و كلية و تخرجت .. و صرت صيدلاني و اخوتي هسه موجودين عندي اخ و اخت .. و من ابوية ذاك عندي اخوه ثنين … كلهم علاقتي بيهم زينه .. لو يطلبون مني مي عيوني انطيهم .. بس ابوية العايش ما احبه .. احترمه اي .. سلامي وياه و اسأل عنه صح بس ما احبه .. حتى اخوتي الولد الي من عنده يعرفون بهل الشي .. من كبرت جنت مرات اسأل نفسي سوال .. لو .. اني بقيت يم ابوية الاول جان صرت صيدلاني و كملت دراسة؟؟
اكول لا و الدليل اخوتي الي من ابوية .. مبطلين من الدراسة و يشتغلون اعمال حره .. بس اخوتي الي من ابوية المتوفي طلاب و كاتلين نفسهم كتل عالشهادة … علمود هالشي صار عندي بالدليل القاطع و يجوز غلطان اني .. الاهل همه المدرسة الحقيقية .. عالعموم مو هذا موضوعنا … امج تقبل اتزوجج لو تخاف لا ابوك غراضكم مال البيت ههههههههههههههه … طبعا ماتت من الضحك و راحت حجت لامها .. امها كالتلها لو بس هو يبقى بالدنيا ما اقبل بي .. كالتلها زين .. و اني علمتها تسوي شغلة .. كلتلها جيبي امج للصيدليه و خلي اسلم عليها .. طبعا امها متدري اني منو بس حاجيتلها بنتها انو هي تاخذ مني علاج و مرات من ماعدها انطيها .. و طبعا امها هواي تدعيلي .. جابتها و خطية بالكوى تمشي .. بس شفتها طبت جريت الكرسي و كعدتها .. بستها من راسها .. و كالت هواي نور حجتلي عليك ما اعرف بيش اجازيك ابني .. كلتلها تعفين عني .. جان تكول شنو .. كلتلها تعفين عني و تعذريني ست … جان تضحك كالت شنو قصدك .. كلتلها اني فلان ههههههه .. جان تكول تدري والله العظيم اني كل شي توقعت .. كل شي .. و صح اسمك نفس الاسم بس عادي اسمك متداول بكل الوطن العربي يعني متوقعت انته نفس الطالب .. معقولة ؟؟؟
كلتلها اي واني حجيت كل شي لنور .. و بقت متعجبه كالت ادري شلون تغيرت من حال لحال .. كلتلها تعرفين اني جنت ما احب اتذكر بس خلي اكون صريح وياج .. البنية الي ردت اخذها مو صديقة نور .. هي نور نفسها .. و لان ردت اخذها لازم تعرف عني كل شي .. ومن محاسن الصدف طلعتي انتي امها … و من سمعت صوتج معرفتج طبعا .. لان نور مكالت امي معاونه كالت معلمة … و اني شوكت متحددين وقت اجيب امي و اخوتي واجي … طبعا ههههه اني هالحجي قديم داحجي صار ٣ سنوات تقريبا .. و هسه مريتي يمي .. و امي واخوتي يموتون عليها .. و صارت قطعة من عدنا .. و عرفتها على ابوية المتوفي وديتها حجت وياه الف رحمه على روحه .. لان جانت امنيته يزوجني بس المسكين توفى … و طبعا ابوية العايش هم شافها وتعرف عليها بس من باب (الاحترام والموده) … و هسه عايشين بخير و عافيه … و اتمنى من كل كلبي الخير و الموفقية للجميع ..

المصدر :صفحة ابو بغداد