قصص من الواقع

بوري المي

تعلمت من امي ما اطلع بره … و كل ما اريد اطلع العب بره وي الجهال تجرني تفوتني جوه و تخوفني بالعجوزه لو بالعصابة الي تبوك جهال … و فوكاها تحجيلي قصص على عجوزة تبوك الجهال و تخليهم بالحمام و بعدين تطلع واحد واحد تطبخه و تاكله … اني من جنت اسمع هالقصص من ماما اخاف و ما اتجرا اوصل باب الحوش … جان عدنا بالحديقة قفص مال دجاج … هالقفص بصفه بابا مجمع صناديك مال حليب و ببسي فارغات … اني جنت اجيب كارتونه و اخليها عالبطاله و انزع نعالي (مكرم القارئ) و اصعد فوك الصناديك اباوع عالجهال من فوك الحايط … واختار الوقت الي امي بي ملتهيه بالمطبخ تطبخ .. وهي تدري اني بالحديقة كاعدة العب … جنت اتمنى اطلع العب وياهم بس صدك كمت اخاف و من جنت اشوف مريه فايته بالشارع جبيرة بالعمر ولابسه عباية كبل انزل راسي و انتظرها تعبر لان اخاف لا هي العجوزه الي تبوك الجهال … و مرات جنت ارفع راسي بس اطلع عيوني اباوع عليها و من كل عقلي انتظر تبوك جهال من الجهالي الي بالشارع و تخلي جوى عبايتها و تاخذه للحمام … وجنت كل مره اترزل من ماما .. تكلي لاتسوين هيج بعد اخاف توكعين و تنكسر رجلج لو ينكسر ظهرج .. و صارت حياتي عبارة عن حديقة و بيت … و تعلمت على هالعيشه … و شوية كبرت كمت اني اساعد امي بالطبخ و طبعا هالحجي كله اني ممدخليني مدرسة .. يعني عمري بده يكبر و اهلي ميقبلون البنيه تدخل مدرسه و اني على كبر تعلمت اقرا و اكتب … طبعا اني الجبيره بين اخوتي و جنت اعامل اخوتي مثل ما امي تعاملني اخوفهم من العجوزه و من العصابه الي تبوك جهال .. بس بيوم من الايام انصدمت بشغله .. اني صار عندي اخت و اخوان ثنين .. فد يوم اخوية الاصغر مني راد يطلع بره و اني ما قبلت و خوفته اشو امي رزلتني .. كالت هالحجي لاتكولي لاخوج بعد وعوفي بكيفه يطلع هو ولد ماعليه شي .. بذاك الوكت جانو الباقيين جهال صغار كلش بس هو اصغر مني بسنتين .. انصدمت بحجاية امي و افتهمت و تعلمت ان الولد يطلع و العصابة متبوكه و العجوزه متاخذه يمكن لان ولد لحمه مطيب .. و بيومها سالت امي .. كلتلها يمه ليش اخويه يطلع عادي بس اني ما اطلع .. و هنا طلعت كلمة جديدة .. بس مالها ربط بالخوف .. كلمة عيب .. عيب البنات يلعبون بره و صيحي البنات يلعبون وياج ..
زين يمه اني شلون اصيحهم واني اصلا ماعرفهم و اصلا اني مداخله مدرسه و ماعندي علاقات وي البنات .. كالت دروحي رتبي الصاله راح يجون بيت عمج .. و سدت الموضوع و اني هم سديته و تعلمت على هالعيشة و للأمانه ما جنت كارهتها و متوقعه هالشي هو الطبيعي الي يعيشوه الناس .. يعني البنات ميروحون مدارس و يبقون بالبيت و الولد مينخاف عليه و يطلع بره و محد يتقربله .. و كبرت على هالشي …
و اختي هم كبرت وياي على هالشي .. صار عمري ١٩ سنة و اني مداخله مدرسة .. و لا اعرف اقرا و اكتب بس شوية اعرف حروف من اخوتي تعلمت .. و اختي اصلا مالها واهس تتعلم .. بس اني جنت اتعلم بكتبهم … و بعمر ١٩ تقدملي ولد لا اعرفه ولا يعرفني و اصلا اخذو رأي شكليا .. يعني جوابي رمزي و اصلا اني جاوبي جان (بابا قبل بي لو لا) يعني قبلت بي على قبول بابا .. الولد معلم مال ابتدائية .. كرايبنا بس احمد الله و اشكره طلع ابن اوادم … من رحت لبيتهم هو جان الوحيد لأهله .. ابوه موظف بسوق الثلاثاء (الاورزدي) بذاك الوكت .. و امه ربه منزل … دللوني عبالك بنتهم .. و اني هم شلتهم على راسي مثل امي وابوية … هو يحبني و جان يسألني شنو امنيتج .. اكله اتعلم قرايه و كتابه و كام يعلمني و مرات حتى ابوه جان يصيحني يكلي كتبيلي فلان جمله لو فلان شغله … و جانو يكيفون من يشوفوني اعرف اكتب و صدك والله تعلمت قرايه و كتابة … و جنت من اشوف شغلات صعبه بالكتب الي ينطوها الي اروح اسألهم يشرحولي رأسا و كلش يكيفون من يشوفوني اتعلم … و مو بس هيج .. مرات من جان يجي الليل و ننام عالفراش يكعد زوجي يحجي و يعلمني شغلات .. و جان يفهمني على كد عقلي يعني ميحجي عبارات صعبة اني ما افتهمها .. مره حجالي شغله بقت براسي و دائما اتذكرها … كالي سوال حبيبتي .. هسه اذا ادزج تجيبلي مي اشربه منين تجيبلي المي ؟؟؟
كلتله من البوري غير .. كالي يابوري .. كلتله طبعا بوري السنك الي بالمطبخ .. كالي زين ليش متجيبلي من بوري الحمام (مكرم القارئ) كلتله ايييع حبيبي شنو هاي .. كالي حبيبتي تره المي مال بوري الحمام و مي المطبخ ثنينهم نفس الشي .. بس انتي من جيتي للدنيا شفتي اهلج دائما يشربون من مي المطبخ و انتي تعلمتي هالشي و عقلج الباطن اخذ فكره اسمها مي المطبخ نظيف و مي الحمام مو نظيف و هالشي مو حقيقي لان ثنينهم نفس المي .. بس .. لو انتي جايه للدنيا و دائما تشوفين اهلج يشربون من مي الحمام جان هسه من سالتج هالسوال كبل تكولين من بوري الحمام اروح اجيبلك مي .. كلتله اي والله صدك .. كالي و هالشي معناها احنا نتاثر و نتعايش بالمحيط الداير مدايرنه .. انتي هسه اختج ممتزوجه .. و اختج مطالعه باب الحوش و متعرف تقرا و تكتب .. اذا تزوجج ان شاء الله و صار عدها جهال راح تسوي كل الامور الي تعلمتها من امج بجهالها .. و هالشي غلط .. كلتله حبيبي الاهل ميغلطون .. كالي همه ميغلطون بس همه هم تعلمو من اهلهم هالشي مثل الوراثه .. اختج ولدها راح يدخلون مدارس و بناتها و اني هالشي ما اقبله اني بناتي اذا الله رزقني ببنات حالهم من حال الولد … يعني اذا صار عدنا جهال ماكو فرق بين الولد و البنيه .. كلتله يااااا صدك تحجي .. كال والله .. سكتت و بيومها هو نام و اني بقيت كاعده افكر .. يعني بناتي عادي يروحون مدرسة و يلعبون بالشارع وي جهال المنطقة .. و صدك والله ورى فتره الله رزقني بمريم و ورى مريم اجاني علاوي و ورى علاوي جاني احمد و مريم داومت مدرسة و جانت كلش ذكية لدرجة هي جانت تقرالي ترجمة الافلام الاجنبية لان اني ما الحك اقراها بسرعة … و جانت هي تدرس اخوتها .. وكل الجوارين يحبوها و محبوبه بالمدرسة حبيبتي … و ابوها جان وين ميروح ياخذها وياه و جان يلعبها لعبة لحد هسه اتذكرها لان اني لاعبه هاللعبة وياه .. اللعبة اسمها شوفني و اشوفك … هاللعبة عبارة عن نوكف بالسيارة بشارع بي محلات هواي .. و هو يشوف فد كلمة مثلا كلمة جميل … و يسأل يكول شوفوني كلمة جميل .. احنا ندور بالقطع مال محلات لو قطع الدكاتره و نشوف وين اسم جميل و نكله هذاك الاسم يكوووول صح .. و بعدين احنا نشوف كلمة و نكله شوفني كلمة هيج مثلا .. وهو يدور .. هيج جان يلعبني حبيبي قبل ما اضبط القرايه و الكتابة .. و مريم كامت تلعب نفس اللعبة ..
و اختي تزوجت بس الي اخذها ابن عمي .. ابن عمي نسخه من بابا و من عمي .. طبعا سبحان الله حجي حسن زوجي كله صحيح .. جهال اختي الولد دخلو مدرسة و البنات ما دخلتهم مدرسة … اني من جنت اروح يمها اكلها خلي يدخلن مدارس .. تكلي يمعوده يامدارس اول وتالي يتزوجن مثلنه شراح تفيدهم المدارس .. كلتلها بس مريم هي تدرس اخوتها .. كالت هم تاليتها تتزوج .. جنت اسكت .. لان ماعرف شحاجيها هي خطية ما اجاها رجال مثل رجلي .. يفهمها هالشي … و ارجع واكول اني اهلي مو غلط لان اهلي تعلمو هالشي من اهلهم .. و على كولة حسن رجلي الموضوع حاله حال بوري المي .. و ورى هالسنين اني هسه افتخر و ارفع راسي بنتي مهندسه و تزوجت و زوجها هم مهندس و ولدي واحد محامي و الثاني صيدلاني … و محترمين و ما شفت فد يوم منهم شي مو زين و ماريد شي من هالدنيا غير راحتهم و الله يحفظلي رجلي الي هو فتح عيوني على هالدنيا .. والله العظيم الانسان اعمى لحد ميتعلم قرايه و كتابه .. لان هواي امور راح يفتهمها … مو شرط تاخذ احسن شهاده بس شرط تعرف تقرا و تكتب .. بدون القرايه و الكتابه جنت ما اعرف شي غير الطبخ و التنظيف و الحديقة و المطبخ و البيت .. و كل هالفضل يرجع لزوجي حسن ..

المصدر / صفحةابوـبغداد

مقالات ذات صلة

اترك تعليقاً

زر الذهاب إلى الأعلى