قصص من الواقع

ذكريات

هو مجان حلو ابد ..بس عليه شخصية و لباقة و لياقة بالحجي تخلي القاصي و الداني يعشقه و يحب يكعد يسمعله الي يحجية ..
ما جان يلبس ماركات او هدوم غالية و لبسه جدا طبيعي .. بس البنات كلهم يباعون عليه و يتمنوه … و طبعا اني منهم اكيد ..
حدي بالتصرف وي كل البنات بس الي تقصده بطلب لو بمنهج ميقصر و يشلع عيونه ينطيه …
طبعا الي خلى كل البنات بالقسم يفكرون بي .. هو احترامة و شخصيته القوية بين الكل ..
جانو الشباب الي وياه بالقسم عبالك عايشين بعالم ثاني و هو لوحدة عايش بعالم ثاني ..
يعني الي وياه دائما ملتهين بكال البنطرون البلو و حجه البنطرون الجكر و شفتو الحذاء (مكرم القارئ) الكتلبر و شفتو الحذاء الكيكرز ..
هو لا ..
جانت اهتمامته مختلفة .. حتى حلاقة شعره ميمشي بيها عالمودة مثل باقي الطلاب ..
دائما شعرة صفح و لحيته خفيفة .. لا يخلي دهن و لا جل و لا يحفر و لا يطول زلوف ..
و تقريبا 90 بالمية من الطلاب يدورون تنسيق و علاقات خصوصا وي جماعة المرحلة الاولى (البنات الجدد) هو لا ..
عالعموم و نهاية لكل التعريف عن شخصيته اكدر اختصره بكلمتين (رجل مثالي) ..
بس هالولد المثالي محد من عدنا يعرف الواقع الي جاي منه و لا يعرف شلون عايش ..
لان مثل مكلت حدي جدا و ميذكر اي تفاصيل عن نفسه مثل باقي الطلاب و ماعنده شي اسمه تباهي … يعني ميفيك ..
اني الوحيدة الي عرفت كل هالاشياء من خلال صدفة صغيرة ..
و طبعا الي خلاني اعشقه لحد الجنون هو تصرفه و عدم خجلة من هالصدفه ..
بيوم من الايام اختي الاكبر مني انخطبت .. طبعا احنا حالتنه المادية زينة و فوك الزينة …
الي خطب اختي ابن صديق ابوية .. وطبعا نفس الطبقة الاجتماعية ..
بوكت شراء الذهب و باقي السوالف.. رحنا اني وامي و اختي و ام الولد للكاظمية حتى نشتري ذهب ..
افترينا و اشترينا شغلات و ذهب و ام الولد كالت خلي نكعد ناكل بأي مطعم و بعدين نرجع …
ما حجينا و دخلنا بمطعم يم سوك البالات .. يعني شوية ليكدام من الصياغ ..
وصينا اكل و كعدنا .. المطعم بي اكثر من عامل ..
هو جان واحد من العمال بس مو هو الي قدملنا الاكل ..
جان ملتهي ينظف الميوزة و ما منتبه علينا ..
اني من شفته رئسا كلت لأختي كومي كعدي بمكاني .. تحولت بالكرسي مال اختي و انطيته ظهري .. حتى لا يعرفني و يخجل ..
بس الي فاجئني بي .. هو شافني واجه و لا خجل .. و سلم علينا و عرف نفسه كدام امي و كدام اختي و ام الولد ..
و كال شرفتونا و اني هم عرفتهم عليه .. و راح جاب شغلات زيادة و زلاطات و مقبلات و اهتم كلش بالميز مالتنه ..
كملنه الاكل و كمنا ندفع الحساب ..
لكينا ابو المطعم يكول حسابكم واصل .. امي وام الولد ما قبلت بس ابو المطعم كالها والله متدفعون .. دفع حسابكم فلان .. بهل الحجي اجه هو وكال خاله شلون تقبليها تدفعون واني هنا و انتو اول مرة تشرفونا و اتشرف بمعرفتكم ..
و حلف مندفع و طلعنا ..
طبعا بذاك الوقت جان حساب وجبتنا جبير و اني متأكدة حساب اسبوعية كاملة ..
امي شكالت من رجعنا للبيت .. كالت عيب و حرام .. خطية الولد زميلج انحرج و دفع الحساب .. اخذي فلوس وانطي من تشوفي بالدوام ..
وراها داومت و اخذت فلوس و سلمت عليه وردت انطيهياه ..
هو ساكت و يباع عليا بس نظرته بيها الف حجاية و حجاية ..
اني جنت احجي واباع بعيونة .. كلتله اني اعرف و اكيد وضعك ميسمحلك تدفع حسابنا و اعرف راح
يأثر عليك هالمبلغ و الله يرزقك بس ميصير والله ..
كالي من تكملين كلامج عود كولي كملت حتى اني احجي ..
كلتله زين و كملت كلامي و نهيت كلامي بجملة (ثق واعتقد الي صار راح يبقى سر) هو ضحك بس فدوة شلون ضحكة .. ضحكة واحد شخصيته قوية و مخجلان و لا راح يخجل من شي ..
كال كملتي ؟
كلتله اي ..
كال .. يابنت الناس سمعي .. اني ما مستحي من شغلي ولا من ظرفي المادي ولا راح اخجل .. و لو اخجل مجان جيت سلمت وجان تهربت من عيونج من شفتج .. هاي الكلية و هذولة الطلاب دشوفيهم (وأشر بيده عالطلاب) كال كلهم رايحين و اني وانتي هم رايحين .. الي راح يبقى من عدنا ..
تعالي تعالي ..
اخذني وياه يم الحايط وطلع قلم جاف و كتب عالحايط .. ذكرى فلان و فلانة بتاريخ هلكد هلكد ..
كال بس الذكريات تبقى .. كلنا رايحين و حتى هالذكريات الي تنكتب عالحياطين هم راح يجي يوم و تنصبغ وتروح .. دسمعين صوت ضحكات الطلبة و سوالفهم .. راح تصير ذكرى و بس الذكرى الطيبة تتسولف ..
و بالنسبة للفلوس الي جايبتهم .. مراح اكول عيب والله يبعدكم عن العيب .. بس ماترهم ..
رجعيهم و بوسيلي راس الوالدة و كوليله مرة مرتين عشرة الف الفين مرة تجي للمطعم هم راح اسوي نفس الشي ..
اني سكتت بكلامة بس والله والله لو بيدي احضنه .. لان رجال رجال رجال ..
كلتله زين .. كليجة ..
كال شنو ؟
كلتله اني حسويلك من ايدي صينية صغيرة مال كليجة هم كول ما اريد ؟
ضحك و كال ماشي و ترخص مني و راح .. بس روحته هالمرة مجانت روحه عادية .. عبالك روحي طلعت من جسمي و راحت وياه ..
شلعني شلع من جذوري و اخذني وياه …رجعت للبيت و سويت صينية كليجة و كمت اتفنن بلاشكال و القوالب .. وكل شوية ازيد شي .. ام السمسم و اكول اخاف ميحبها .. خلي اسوي ام التمر .. و هم كلت اخاف ميحبها .. سويت كل الانواع .. ام المبروش و الجوز و الحلقوم و التمر و السمسم و حتى لفة الخميرة هم سويت .. حطيتهم ببلم جبير و جيسته زين .. ثاني يوم وديته البلم وياي و انطيته اله ..
كال والله زاحمتي نفسج ..
من وراها علاقتي زادت بي .. كمت كل شي ما اعرفه اروح عليه و اسأله و حتى الي اعرفه هم اروح عليه اسأله بي بحجة ما اعرف .. وهو خطية يجاوب و ابد ميتكاسل ..
الى ان علاقتنا كامت تعبر مراحل و مراحل و مشاعرنا كامت تبين بالعيون .. يعني عيوني و عيونه فضحتنا ..
كام من يكعد كبالي يسرح بعيوني و يسكت و اللباقة و اللياقة الي عنده بالحديث كامت تختفي هههههه .. خطية يريد يكول احبج و ميعرف ينطقها ..
لحد ما اني سهلتله الموضوع و كمت اسحبه و استدرجه بالحجي حتى اسمعها بلسانه ..
و كالها و اني مترددت لحظة ان ابادلة بنفس الكلمة ..
مشت الايام علينا و عشنا احلى ايام و احلى ذكريات .. و بدل الذكرى الوحدة الي انكتب عالحايط .. صارت كومة ذكريات مو بس عالحايط حتى عالاشجار .. و الذكريات مو بس مكتوبة .. ذكريات عشناها سوى و ضحكات و كلمات حجيناها بكل مكان بالكلية و برى الكلية ..
و كالي فاتحي اهلج بموضوعنا لان خلص اريد اجيب اهلي واجي اخطبج لان الطلبة تقريبا كلهم عرفو بعلاقتنه و هو ضاج من هالشي كلش .. يريد كلشي يمشي بالقانون و سمعتي و شرفي من شرفه صار …
و كلت لأمي و خطية معترضت بس كالت ابوج متأكدة مراح يقبل بس نجرب ..
و اخذت موعد من ابوية و الولد جاب اهله و حجه ظرفه لأبوية و كاله احنا عدنا بيت ملك و صح امكانيتنه مو كلش زينة بس عايشين و مناقصنا شي و اني و اخوية ندرس و نشتغل و والدنا متوفي ..
همه بس ولد ثنين و امهم ..
ابوية ما قبل .. و الي تفاجئت بي ..
كالهم البنية حاجيين عليها بس اني استقبلتكم لان ما اعرف ارد انسان يدوسلي و يعبرلي خطوة و اخلي على راسي ..
كمت ابجي بيومها و كلت لأمي اني ما اصير لغيره لو اموت ..
امي ما بيدها شي طبعا ..
و طلع ابوية صدك كلامه .. ابن عم الي ماخذ اختي رايدني ..
و ما قبلت اني و ما قبلت .. بالدوام جنت اشوفه الولد ضعف و شكله تغير .. و كام يدور مشاكل وي الطلاب و حتى وي الاساتذة ..
محاضرات ميدخل .. و حتى وياي من يكعد بس يسكت ..
كل ما احجي وياه ابجي واكله هاي من ورايا مووو ؟
يكلي لا هالسوالف قسمة .. و يسكت ..
و زوجوني اهلي و بطلت من الكلية و انتهت علاقتي نهائيا بالولد …
الي تزوجته حاله حال الطلاب الي يفيكون .. اهم شي عنده عطرة و لبسه مكوي و سوارة و زنجيله الذهب و السيارة تلمع .. واحد عايش عالمظاهر .. و عبالك ماخذني حتى بس يكمل صورته كدام الناس و المجتمع ..
لا حب و لا صخام .. يرجع من الشغل عالمزاج يتعامل وياي .. اذا يريدني ياخذ الي يريده و يعوفني و يبدل و يطلع .. و اكثر اسألته شنو ؟؟
محتاجه فلوس ؟؟
تريدين تروحين لبيت اهلج ؟؟
شمسوية اكل ؟؟
و الباقي كلشي عنده عادي .. يعني مرة هلكد ما زهكت طلعت جكارة كباله ودخنت .. ضحك كال تدخنين ؟
كلتله اي .. كال زين اني حطلع ممحتاجة شي ؟
طفيت الجكارة و كلتله لا ..
هاي صارت حياتي بعد ما زوجوني الي ما احبه …
و طبعا خلفت من عنده ثنين بس روحي مو بي و لا اريده ..
بس خلص ..
شسوي .. قبلت بالواقع رغم سخافته و مرارته ..
من مرات تجيني اختي و احجيلها حتى ببداية زواجي .. تكول انجبي (مكرم القارئ) و سكتي .. على الاقل موفرلج كلشي ..
مو احسن متاخذين واحد تكظين عمرج وياه اقساط و كال سعر التمن و حجه سعر الدهن ..
اختي كلشي عدها فلوس .. حالها حال ابوية ..
كمت اخر شي اتأقلم وي الوضع و احاول اتعايش وي الواقع ..
لحد ما كبرو شوية جهالي و طبعا حياتي بقت مثل ما هي ..
و ابوية توفى … و اختي و رجلها سافرو … و امي جتي عاشت يمي بالبيت ..
الحاصل ..
بيوم 2012.5.17
اجاني خبر وفاة زوجي بعد ما تسلب على السريع مال دورة .. دخلت بحالة نفسية جدا رهيبة و جهالي تأذو كلش .. و قررنا نسافر لعمان يم بيت اختي هناك نستقر اني وامي والجهال ..
قبل منسافر و بعد وفاة زوجي بسنة و شهرين .. اخذني الشوك لحبيبي و وطني و ملاذي و نبضي القديم ..
قررت اروح اشوفه أو احاول اعرف اخبارة .. اني اندل بيتهم و اندل شغلة القديم ..
رحت بالسيارة و لكيتهم بعدهم بنفس البيت و نفس المنطقة ..
طبعا رحت وحدي و اني اسوق .. صارت عندي جراءة انزل و ادك بابهم و اسأل على بيت او مشتمل للأيجار بالمنطقة ..
طلعتلي بنية صغيرة .. بعدني داسألها جان اتفاجئ بصوت مرية تصيح بأسمي ..
جمدت بمكاني ..
صاحت صابرين صابرين …
بعدين جتي المرية من ورى الباب .. جان تجر البنية الصغيرة ..
طلعت الصغيرة اسمها على اسمي صابرين و مبينه بنته لروحي من الدنيا ..
كمت ما اعرف احجي والدمعة طفرت من عيني ..
زوجته كالت تفضلي عيني ..
كلتلها فدوه ماكو بيت هنا ايجار بس (سويت نفسي امسح عيوني) .. لزمتني العبرة اختنكت كلش بس مخليت زوجته تحس ..
كالت اكو دلال بالركن اسمه ابو فلان و خطية طلعت تدليني و متعرف اني جاية على رجلها و بتها اسمها على اسمي ..
تشكرتها و صعدت السيارة و رجعت يم الكلية مالتنا و طبكت السيارة و كمت اتذكر كلشي صار ويايه قبل ما اتزوج .. شبعت بجي و ارتاحيت و رجعت لبيتي ..
و هاي جانت اخر مرة اشوف بيها كليتي و بيت حبيبي السابق .. وراها طلعت لعمان و من عمان سافرت لهولندا و استقرينا هنا ..
اني جنت اكدر التقي بي .. و اشوفه ..
بس حسيت نفسي كلش حقيرة و كلش سخيفة اذا اسوي هالشي .. انقهرت على زوجته و حاولت اخلي نفسي بمكانها ..
و هسه عايشة عالذكريات و هاي هي .. مو كل شي الي يريدة البشر يصير .. مرات الظروف تفرقنا .. بس يبقى للذكريات طعم و ضحكة و ابتسامة .. صح ابتسامة مكسورة و بيها وجع ..
بس على الاقل اكو ابتسامة خفيفه ..
المصدر : صفحة ابو بغداد.

مقالات ذات صلة

اترك تعليقاً

زر الذهاب إلى الأعلى