قصص من الواقع

قسمتي

خلصت الجيش و رجعت للشغل … شهادة ما عندي … صنعة ما عندي … كل الي عندي اعرف اسوق وبس … كمت ادور بالمنطقة على واحد ينطيني سيارة اصعد بيها سايق … و كل ما اوكف بركن لو اوكف يم محل اخلي خبر .. يابه اريد اشتغل سايق .. يابه اريد سيارة اصعد بيها … و بيوم من الايام كاعد بالبيت بالصالة اني و امي دايخين بسالفة التشربت مال السطح لان سطحنا جان يرادله تشربت و الوضعية تعبانة .. جان تندك الباب .. طلعت لكيت ولد من جماعتي كالي مو تريد تصعد سايق بسيارة .. كلتله اي دخيلك .. كالي اكو رجال عنده لاندكروز يريد بيها سايق .. كلتله على يا خط تشتغل .. كالي ماعرف اي تفاصيل امشي نروحله … رحنا اني والولد و وصلنا لبيت الرجال .. دكينا الباب و طلع و الرجل فوتنا للصالة .. بالصالة جان اكو ولد نايم .. بس وجهه للسكف … الولد من دخلنا لا كام و لا حتى رد السلام من سلمنه … طبعا الصالة جانت كعدة عربية يعني بساطات … ماكو قنفات .. كعدنا بالكاع و الرجال راح يوصي اهله على جايات .. و احنا حسينا وضعية هالولد مو طبيعية … و استحينا نسأل الرجال … الولد جان يطلع صوت بس ممفهوم .. يعني ميعرف يحجي بس شلون واحد يدندن .. المهم اتفقت وي الرجال و كالي شوف انته مثل ابني … كلتله تدلل يابه كول .. كال اني قبل اسبوع لميت الجادر مال الفاتحه … مرتي توفت .. ولو ممتوفية مرتي جان ما احتاجيت اصعد احد بالسيارة … اني عندي هالولد النايم وراك .. و عندي اخته و بس .. قبل جانت امه مداريته و هسه راحت .. طبعا من كال راحت لزمته العبرة و نزلت دمعته .. كلتله عمي الله يرحمها و الها الجنه .. كال المهم … من توفت هالولد مشلول .. واني المسوول عنه حاليا .. ماعندي قدرة مالية اجيب احد يداري و اخته متكدر تداري لان دتشوفه حجمه جبير … اني علمود هالشي بعد ما اكدر اشتغل بالسيارة .. و هذا سويج السيارة و ما اريد منك شي غير بس تمشي وياي على حب الله …
كلتله صار عمي و كلش اختنكت من الموقف … طبعا السيارة نظيفة كلش و جان لازم بيها خط الرجال .. خط مال موظفين و بنفس الوقت تشتغل على خط منطقتين … يعني الغبشة اطلع اخذ الموظفين اذبهم بجرف النداف بالشركة العامة … و اروح اشتغل على العبيدي و الظهرية اروح اخذهم ارجعهم … و بديت بالشغل و داريت السيارة كلش و جنت ابد ما اخربط وي الرجال لان هو وضعه المسكين مثل مكلته .. يعني فوكاها اخربط لو اخذ زيادة … الرجل يوم ورى يوم كام يحبني .. و كمت من ارجع السيارة بليل يحلف ما اروح اذا ما اتعشى … لان السيارة اذبها يمه بالبيت و اروح مشي لبيتنا مو كلش بعيد عن بيتنا … و الصبح اروح اخذها من الغبشة و الكاه كاعد …
المهم .. يوم ورى يوم من كام يثق بيا كام يحجيلي عن خوفه من المستقبل .. يكلي اني عندي اخ واحد .. و مرتي الله يرحمها هم عدها اخوه ثنين … اني خايف بس من شي واحد .. اذا الله اخذ امانته و متت ابني هذا و بنتي شيصير بيهم من ورايا … لان هذا ابني دتشوفه ميتحرك و عنده مرض ميتعالج و كل الدكاتره كالو يوصل عمر معين و يتوفى .. و اخته المسكينه بالاعدادية و متعرف شي بهل الدنيا غير بس الدراسة و البيت … حتى علاقات ماعدها وي بنات المنطقة و منطوية على نفسها .. و من ماتت امها صارت كئيبة كلش و كل ما احجي وياها لو الكاها صافنة لو الكه الدمعه بطرف عينها … اني اريد احمل حمل جبير .. و ما اعرف شلون اطلب منك هالشي … كلتله كول عمي اني خادمك .. كال انته ابن اوادم .. اذا بيوم من الايام صار بيا شي .. ما اريد هالبنية تحتاج شي .. السيارة تبقى يمك و اريدك تندل وين راح تعيش واكيد راح تعيش ببيت اخوية الي بفلان منطقة .. اريدك تبقي السيارة يمك و تشتغل بيها و اليومية الي تنطيها الي تشيلها تنطيها لبنتي بس تجمعها .. كل شهر مرة .. كلتله عمي انته صدك تحجي .. كال والله جاي احجي وياك صدك .. لان الدنيا نفس .. نفس يطب و نفس يطلع .. و احتمال على لحظة ينكطع نفسي و انام يم ام حاتم (زوجته المرحومة اسمها ام حاتم) .. كلتله ماشي عمي و جاريته بالحجي لان حسيت نفسيته كلش تعبانة و خايف على جهاله … و من داطلع بباب الحوش حضني كالي ماريد بنتي تصير خدامه .. كلتله عمي كول يا الله شهل الحجي و حضنته و حسيته يريد يبجي .. جان اسلم عليه و اطلع .. رجعت حجيت لأمي كالت هذا من ماتت مرته خاف و حقه .. لان اي واحد لو بمكانه يفكر هالتفكير و خصوصا عنده ولد (مولود بموهبة) يعني من #ذوي-المواهب … و ثاني يوم من صباحيات الله امي راحت يمهم .. تعرفت عالبنية و عالرجال .. طبعا امي مرية جبيرة بس شنو المنطقة كلها تعرفها … يعني امي من النوع اذا تفوت بشارع لازم تحجي وي الكل … تحب تسولف و تحب تعرف كل شي ..من نسوان كبل … عفت امي يمهم بالبيت و رحت اشتغل … رجعت بليل لكيته يضحك … كالي الله ينطيها الصحه شني هاي امك … كلتله شنو شبيها ههههههه … كال بنتي كامت تضحك و تسولف وياها … كلتله اي امي هيج .. كل المنطقة تحبها و يحلفون براسها … كال انوب مو هنا المشكلة ..
المشكلة هاي بنتي بعمرها مرايحه متسوكة و حتى من امها جانت عايشة هم متروح وياها .. امك سحلتها سحل و اخذتها لسوك الشعبية تسوكو و رجعو يضحكون .. متكلي وين جانت امك و جان يحضني و يبوسني .. كلتله لعد عمي متكلي شنو سالفة الجوارين معقولة الجوارين ما يجونكم ما تروحولهم .. كالي لا والله .. ماعدنا علاقات هنا و احنا اصلا منحب العلاقات هواي .. و كامت امي يوميا تروح يمها و انوب كامت من يجن خواتي زيارة يمنا … تاخذهن و تركض يم البنية .. و حتى نسوان المنطقة تاخذهن يمها … و الضحك وين .. فد يوم رحت ارجع السيارة لكيته واكف بالباب .. ساعة ١٠ باليل .. كالي متكلي امك وين .. كلتله شكو ؟؟ كال اخذت زهوره يسوون واجب و يرجعون .. كلتله شنو .. كال ديله بشرفك هههههه كلتله صدك والله … و جوي بنفس الوقت الي دنسولف بي .. سلمن عليها و بوسوها للبنية و راحو … طبعا المنظر جان كلش غريب … البنية مواصلة ١٨ و وياها اربع نسوان اصغرهن عمرها شده و شوية ههههههه و رايحات يعزن بوفاة … طبعا ضحكت بيومها و ابوها يكلي ميخالف مو بنتي تأخرت للعشره و بحياتها مباقية للسته برى بس اني مكيف … وسلمته السيارة كالي لااا و الله تصعد صديقات بنتي و ترجعهن كل وحده لبيتها هههههههه كلتله اي صديقات بنتك بالاعدادية ههههههه و من يومها كامت السيارة تبقى يمي .. و ورى سنة ونص من هالحجي كدرنا ناخذ بعد سيارة و هم شغلناها على نفس الخط بس فرحتنا مدامت هواي لان حاتم توفى … لحك امه … ابوه رغم ما جان مقهور بس كلي خلص حاتم من هالدنيا .. انولد نايم على ظهره و راح نايم على ظهره .. و الخايف منه صار و جنت متوقعة و منتظرة … و ورى فترة نزل السايق من السيارة الي اخذناها و رجع ابو حاتم صعد يشتغل … و امي متكفله بزهراء هم يوميا سوى .. لحد ما فد يوم رجعت من الشغل جان تكلي مو كافي … كلتلها شنو كافي يمه ؟؟؟
كالت مو كافي عزوبية و هسه عندك شغل زين و تقريبا ثابت يله خلي ازوجك … كلتلها يمه مو وقتها … كالت مو اخاف تروح من ايدك … كلتلها منو .. كالت بنت ابو حاتم زهراء اكو غيرها … كلتلها يمه اني البنية من يوم دخلت بيت الزلمة لليوم مرافع وجهي بوجهها و مشايفها و معتبرها اخت .. كالت يمه هي مو اختك انته عندك خواتك فلانة و فلانة و فلانة و كلهن متسترات و كاعدات وي فروخهن و انت ظل دايح ماكو وحدة تلمك يا مهتلف .. كلتلها شبيج هههههه صدك جذب اشو انهديتي عليا … كالت لعد انجب (مكرم القارئ) و خلي امشيلك عالبنية لا يجي واحد ياخذها منك .. ولك وين تلكه وحده مثلها بنية مرتبة و مثقفة و دارسة … و نعرف ابوها و ابوها يعرفك .. و ناس طيبين و يخافون الله متكلي شتريد .. كلتلها خلص بس على كيفج ليش هيج وياي .. جان تكول مو انته ما تعرف الي مثل هالبنية بسرعة تمشي قسمتها و من تروح من ايدك تظل تتحسر … كلتلها همه بالمنطقة سته ميعرفونهم منين تجيها قسمة .. جان تكول يا ستة ميعرفوهن … غير نسوان المنطقة كلها تعرفها لزهراء و ماكو فريتها بيوت المنطقة كلها .. كلتلها هااا نسيت انتي صديقتها المقربة ههههههه و نسيت انتي حتى تراب الكاع الي بالمنطقة يعرفج .. جان تكول اي اي و كامت تضحك و ثاني يوم مشينا لبيتهم و طبعا ابو حاتم كال وين الكه احسن منك .. و صارت البنية من قسمتي الحمدلله و تزوجنا … و مرت سنين العمر و هسه شغلي يختلف عن السيارات و ابو حاتم هم شغله يختلف .. فتح سكله مال مواد انشائية عالشارع العام .. و ابني الجبير يوميا من الصبح لليل يمه .. ابني الجبير حاليا عمره ٩ سنوات بس متعلق كلش بجده … و ميكدر بدونه .. مدلله .. و طبعا زهراء وامي فريق ..يا ويلي اذا اسوي شي غلط ياويلي … يا ويلي اذا احجي حجاية غلط … علاقة امي بزوجتي مرات اضرب بيها المثل من اسمع موضوع عن سالفة العمه .. اكلهم زوجتي و امي مو علاقة عمه و مرة ابنها .. علاقة ام و بنتها …
قبل كم يوم … جنت كاعد يم ولد صاحبنا ببيتهم … ابنه مسويله عملية و رحنا نقوم بالواجب .. بالكعدة سولفة عالقسمة و النصيب … كلتلهم اني بيوم من الايام جنت كاعد بالبيت اني وامي صافنين منين ندبر فلوس نشربت بيها السطح … و اندكت الباب و بهل الدكة حياتي كلها تغيرت .. دكة الباب هاي جانت قسمتي و رزقي بهل الدنيا … دكة الباب هاي جانت اب … اب و زوجة و رزق و اطفال … اب الي هو ابو حاتم .. صار مثل ابوي … اني ابوية صح لحكت عليه بس ما شبعت منه و توفى … و زوجة الي هي بنته الله يحفظها الي و يخلي يومي قبل يومها … و ميفجعني بيها لان ماتحمل يصير بيها شي … و رزق الي هي الاندكروز الي صعدت بيها سايق و طلعت مصروفي و رزقي منها .. و اطفال الي همه اطفالي … قدري تندك بابي .. و يجيني صديقي سامع عن ابو حاتم يدور سايق … قسمتي يصير هالرجال اب اليا و يصير جد اطفالي ..

المصدر / صفحة ابو بغداد

مقالات ذات صلة

اترك تعليقاً

زر الذهاب إلى الأعلى