قناني الغاز
بالثالث متوسط بديت اطلع لوقت طويل بره البيت … يعني منطقتنا جبيرة و بيها اكثر من سوق شعبي … جنت افتر من الصبح لليل … بحجة صرت جبير شوية … و عندي اصدقاء هواي صارو .. بصف الخامس اعدادي بطلت … و كمت اشتغل بالسوق الشعبي الي بمنطقتنا … جنت اشتغل ببسطية مال مواد غذائية … يعني معجون على دهن على شكر على بقوليات حمص و فاصوليا و هالامور … تعرفت على شباب هواي بيهم الزين و بيهم المو زين … للأسف علاقتي بالشباب المو زينه صارت اقوى من علاقتي بالشباب الزينين … يعني تعرفت على ولد يشرب و بنفس الوقت يبوك شغلات من السوك و هالشي عرفته بالتدريج … يعني سمعت من هنا و هناك و عرفت و من كلتله جابها بضحك بس هو خويي و صديقي و صاحبي و من انخاه يركض ركض …
عالعموم بقيت وياه و للأسف علمني عالشرب .. بديت اشرب وياه و من ورى السهر بره البيت و من ورى الشرب ابوية و اخوتي خمسين مره كتلوني و ضربوني و حتى طردوني من البيت و كمت اصعد قجق (بالختله) للسطح انام .. خطية اختي الجبيرة تنقهر عليا و تحطلي الفراش فوك .. و استمريت بهل الشي .. ما بطلت .. و بيوم من الايام خلصت الفلوس الي جنت اجمعها من شغلي .. و صديقي هم ماعنده … قررنا نبوك قناني مال غاز من منطقتنه .. على اعتبار اني اعرف الجوارين زين و اعرف منو يسهر و منو ساكن بالبيوت … اختاريت بيت ام زهراء .. ليش .. لان ام زهراء عدها بس زهراء الجبيرة موظفة بالمستوصف .. و عدهم بعد وحده صغيرونه و الام .. ابوهم ميت و ماعدهم زلم … طفرت عالبيت و صاحبي ظل ورى الحايط … يراقبلي .. القناني مال غاز مخليهن بالطرمة بصف التنور مال خبز … شلت وحده و بسرعة شمرتها من فوك الحايط .. صاحبي اخذها و طفر بيها و اني طفرت وراه … بعناها ثاني يوم و صرفنه فلوسها … وراها طفرت على جوارينه حايط عالحايط اخذت منهم بايسكل مال ابنهم صغير … يلعب بي و يعوفه بالحديقة … و هم بعناه … و وراها قررت اطفر على الحياطين مال سطوح لحد ما اوصل لبيت حمودي ابو الحمر و اخذ طيورة … و طفرت عالبيوت و حاولت افتح برج الطيور و حسو عليا و طفرت و من الخوف وكعت من سطح البيت الي بصفنا للكاع و انكسرت رجلي … طبعا همه عافوني بس عرفو منو اني لان التمو يم بيتنا و عرفو اني وكعت من السطح … و اني بقيت بالكاع نايم و اصيح … اهلي طلعو و اخوتي و ابوية عبالهم سكران و واكع من فوك … ودوني للمستشفى و عالجوني … رجعت للبيت كعدت بالغرفة و ابوية فات عليا شايل توثية يريد يضربني فوك ما اني مكسر … يكلي ولك شسوي بيك خزيتنه و فضحتنه كبال العالم … امي و اخوتي التمو عليه يجروه مني .. كام يصيح يكلهم مو ابني … ما اريده … طلع حرامي و عابر على بيت ابو احمد يريد يبوك طيورهم و لحكوه و انهزم و وكع من الطابق الاول … و احنا عبالنه سكران … بذيج الساعة كمت ابجي .. و اهلي ما يحجون وياي … خطية بس اختي تجيبلي الاكل و تداريني .. و اني اعرف الصوج مني .. و فوكاها شلون راح اواجه الناس ورى ما اطيب … و مرت الايام و طبت و رجعت اطلع للشارع .. طبعا ابوية ما يحجي وياي و اخوتي هم ما يحجون وياي .. اول شي سويته رجعت للدراسه .. و عفت صاحبي الي علمني عالشرب و عالبوك .. و اشتغلت عماله .. و حاولت اتعلم صنعه يعني مو عماله و كبل .. و الخلفه الي اشتغلت وياه اخوه يسوي تأسيسات صحيه و كهربائية للبيوت .. فد يوم جان محتاج عامل و اخذني وياه و من يومها كمت اطلع وياه .. تعلمت اسوي تأسيس كهربائي للبيوت .. و ايدي اخذت عالشغلة .. بس شنو اني الناس لو اغسل روحي بتيزاب كدامهم ما انظف لان خلص بالمنطقة صرت حرامي .. يعني من يحجون بيناتهم يكولون فلان الحرامي ..
مشت عليا و صرت بنظر الكل حرامي .. و اني والله العظيم بطلت كل هالسوالف و رجعت ادرس و اشتغل و حتى ابوية و اخوتي رجعو يحجون وياي … و بيوم من الايام اشتريت قناني مال غاز ثنين .. و رحت بليل شمرتهم بالحديقة مال بيت ام زهراء .. و انهزمت .. بيومها رجعت للبيت و حجيت لابوية بس بجيت .. ابوية حضني كالي مدام انته حسيت بغلطك خلص ابني .. اذا الله يسامح شلون احنا البشر ما نسامح .. كلتله يابه اني استحيت ادك الباب و احجيلهم اني الي بكتها .. كالي ابني خلص انته سويت الصح .. و مشت السنين و اني داومت معهد و تخرجت .. و توظفت … بس بعدها الناس ورى كل هالسنين تذكر هالسالفة مال وكعتي من السطح من طفرت على بيت احمد ابو الحمر .. و بيوم من الايام تقدمت على وحده وصار عندي مشاعر تجاها .. تعرفت عليها من طرف موظف وياي … و من الاصول اهل البنية يسألون عالولد و اهل الولد نفس الشي … و انرفضت لان سألو عليا بالمنطقة و مادري منو كاييلهم هذا جان حرامي و يسكر و حاجيلهم حتى القصة مال الطيور و طبعا الموظف الي وياي هو وصلي هالحجي .. و كلت لابوية اني بعد ما ابقى بالمنطقة .. ابوية كالي انت مخبل شنو هالحجي .. كلتله والله العظيم ما ابقى .. ادري غلطت بحياتي يعني هالغلط راح يلحكني طول العمر … ابوية كالي زين عالاقل خلي نزوجك و بعدين اعزل لان محد يأجرلك مشتمل لو بيت و انته رجال وحدك … و زوجوني وحده من كرايبنه و رأسا عزلت من البيت و الحمدلله الله وفقني و شغلي بالتأسيسات على الوظيفة كدرت اخذ كاع و الكاع صارت بيت و هسه عندي وظيفة راتبها كلش زين و عندي محل تأسيسيات كهربائية و صحية و عندي بيت ملك وسياره .. و عايش اني و جهالي و زوجتي بخير و سلام … بس السوال .. اني غلطت و ماكو انسان بهل الزمن معصوم من ارتكاب الغلط … شربت و سرقت ماشي .. بس بطلت هالشي .. و هسه ورى هالسنين كلها والله العظيم و داعة جهالي لليوم بعدهم بالمنطقة يتذكرون الحادثه … و اني متأكد يحجون بيها بيناتهم … يعني الانسان الي يغلط و يستمر على غلطه ماشي خلي يحجون بي و خلي يكولون عليه اشكال و الوان .. بس اني ندمت و بطلت الطريق الغلط الي مشيت بي .. و كل الناس شافتني ماشي صح و اروح بدربي و ارجع بدربي .. بنية حبيتها و عجبتني و خطبتها .. تروحون تكولون عليا اشياء اني سويتها صح بس استعدلت و مشيت عدل ليششش .. اني ما اقصد اني حاليا احب البنية بالعكس البنية راحت و تزوجت و الله يستر عليها و يرزقها هي و اهلها و رجلها و جهالها كل الخير .. و اني رجل احب زوجتي و اولادي ..
قصتي ليش حجيتها … لان ابني قبل كم يوم كاعد هو وصديقة بره باب البيت ديسولفون … واني داشتغل بالطرمه بشغلات كهربائية و داسمع حجيهم و همه صوتهم عالي .. عرفت من حجيهم انو ابني معجب ببنيه بس ما سمعت باقي الحجي .. من فات كلتله بابا شنو دتحب .. كالي لا بابا و طبعا اني علاقتي بأبني مثل الاصدقاء … كلتله احجيلي .. كال اكو بنية بيتهم بالفرع الورانا .. سألت صديقي عليها يكلي خلي تولي هاي ما خلت ولد بالمنطقة ما حجت وياه … كلتله اش اش لاتكمل ..
كلتله شفت بعينك ؟؟ كال لا ..
كلتله سمعتها تحجي وي احد ؟؟ كال لا ..
كلتله اذا متشوف بعينك و تسمع باذنك لاتصدك … و كلتله هالولد بعد متكعد وياه ابد .. و كلتله ابني ماكو اسهل من الحجي .. اني رجال و انهزمت من منطقتي من ورى الحجي .. لعد الله يساعد البنات بهل الزمن .. اذا متنطي مجال لواحد يطلعون عليها دعايات بس لان ما انطت مجال .. لاتصدك اذا متشوف بعينك و ترى هالحجي مو معناها اني اكلك روح صادق .. من تنعجب بوحده كلي واني ازوجكياها بس مو هسه ورى متتخرج و تجي تشتغل وياي .. كالي ماشي بابا .. و بس ..
