(لازم اكمل) #محطةـروح٤

… جتي السيارة و اخذنا … الطريق جان طويل … كعدنا دنيا ليكدام و اني و سعد و امجد ليورى … السايق الي اخذنا جان مغربي مولود بالنرويج .. يعني العربي مالته على كده …. طلع بالطريق و بنص الطريق شفتهم كلهم ساكتين .. كلتلهم تمطر فكر … ضحكو كالو شنو الي تمطر فكر .. كلتلهم السيارة وين ماكو فكر و حظه نايم جوى الكاع بخمستالاف متر صاعد بهل السيارة و طبعا من عده السايق لان مبين متجنس ههههههه … ضحكو كالو كل شي توقعنا بس متوقعنا انته الي تضحكنا … كلتلهم شسوي يعني ؟؟ على الاقل هسه رايحين و اكو أمل بالموضوع بلكي لموضوع يضبط و مره وحده تضحكلنا الدنيا و طبعا مو عليج انتي داحجي عالدنيا الحقيقية لان انتي متضحكين الا برشوه كامت تضحك خطية … بعدين كمت اشرح شراح يصير ورى منوصل و شراح نسوي .. كلهم يباعون عليا بنظره معناها انته شدتحجي .. و باوعت على سعد .. كلتله هسه اني و امجد و دنيا مناخذ مكيفات و الضحك يجينا صدفه .. انته مو تدخن حشيش و مروغوانا و هالسوالف دضحك شبيك … كال لا .. اني بالمواضيع المفصليه و المواضيع الحياتيه و المواضيع الي تخص حياتي و اهدافي ابد ابد ما ادخن … امجد كاله بله احجيلنا شعندك اهداف … كال مدام السايق ميعرف عربي … اني راح احجيلكم شنو اهدافي … و شنو امنياتي … كلناله شنو … كال اني امنيتي متختلف هواي عن امانيكم .. استقرار … جنت احلم بشي اسمه استقرار … بيتنا كل طابوكه بي ممستقره … من الصبح لليل عركات … عركات بين امي و بين مرة ابوية …
ابوية متزوج ثنين … و رغم ما وضعنا المادي طامس بالخيسة (مكرم القارئ) اذا صحت وحده ثالثة لابوية هم يتزوجها … يعني من الاخير كل همه النسوان … و فوكاها مخجلنه بالمنطقة .. يعني هو رجال جبير بالعمر و عدنا وكالة مال غذائية … النسوان الي يجون يستلمون الحصه مالتهم … كلهن نسوان المنطقة و المفروض هو يعرف هالشي … بس جان يعرف منو مطلكة و منو ارمله و منو متزوجة … و شكو وحده مطلكة لو ارمله .. يحاول وياها من تجي تستلم الحصه … و يترزل .. و يترزل مو بالختله … يترزل على شكل فضيحه و يسمعون الجواريين كلهم …. و طبعا امي و زوجته … يخافون يفكون حلكهم وياه … لان جان مثل المستعبدهم … و اصلا اني مره كلتله … مره تعاركت وياه من وراه سوالفه المكسرة … كلتله اني بس اريد افتهم شي … شلون بيت جدي (أهل امي) و شلون اهل فلانه (مرته الثانيه) شلون انطوك مره و انته هيج … و بوقتها انطاني ذكرى شايلها وياي طول عمري تريدون تشوفوها ؟؟؟ كلناله وينها ؟؟ جان يكف التيشرت و شوفنا ايده و جان بيها خط طويل مبين ضرب و خياطات بس قديم … كال ضربني بهاي الشفرة الي نفتح بيها كواني الشكر و كواني العدس و التمن … و من كثر الدم الي نزفته … تخربطت بمكاني و بعدين نقلوني للمستشفى و لكيت امي و مرة ابوية فوك راسي وهو مموجود … و طبعا تعالجت و طلعت و هو بالجذب ما اجه وياهم … من ذاك اليوم علاقتي بي تغيرت …
و كمت كل ما اسمع حجي من شباب المنطقة على ابوية اطبك وياهم و اكلهم يطبه مرض .. تريدون تحجون عليه روحو كباله واني معليه … و طبعا اخوتي هم مقابلين عليه بس شنسوي … يبقى هو ابونه … و يوم ورى كل ما نكبر شوية المشاكل تزيد و العركات بالبيت تزيد … و اني جنت بين كل هالمشاكل ادور استقرار و اريد عائلة .. فكرت بيني و بين نفسي … كلت اني اذا ابقى عايش بهل الوضع .. اكدر اتزوج ؟؟؟
طبعا لا ..
لان وين اكعدها و وين نعيش بنص هالهوسة …
و قررت اسافر و طبعا بذاك الوكت مجان عندي فلوس توصلني لأوربا … طلعت لسوريا و من سوريا لبيروت .. ببيروت جنت اشتغل حارس بعمارة و بنفس الوقت مقابيل العمارة و بموافقة صاحب العمارة سويت مكان ابيع بي مشاوي اني وبعد ولد عراقي … و اغلب الي يجوون ياكلون من عندي او ياخذون اكل همه العراقيين الي جانو هواي ببيروت و طبعا مرات هم يجون لبنانين يشترون من عدنا … جمعنا فلوس زينه و قررنا نطلع عن طريق البحر للخارج … و اتفقنا وي مهرب و كل شي تمام … و دفعنا الفلوس و طلعنا بالسفينة و بقت السفينة بالبحر كم يوم بعدين وكف و كال يله نزلو وصلنا للسواحل الاسبانية … كلناله وين ننزل احنا بالبحر .. كال ماكدر اقدم السفينة ليكدام لان تغرز .. هاكم هاي نجادات و يله قفزو ترى قريبة كلش … احنا هم لبسنا النجادات و قفزنا و سباحه سباحه سباحه و وصلنا … فرحنا احنا و عالبلاج .. اشو كمنا نتقدم جان نشوف صور مال دعايات … الدعايات بالعربي ؟ و السيارات لبنانيه .. طلع ابن الكلب (مكرم القارئ) مقفص علينا … راحت الفلوس الي جمعتها اني و الشباب و رجعنا توسلنا بابو العمارة الخواجه حتى بس يرجعنا … لان كلناله احنا راح نسافر و خلص … و هم رجعنا نجمع فلوس و جربنا نسافر و هم انلزمنا .. و اربع مرات تخرب طلعتنا و طبعا هالحجي سنين تمر علينا .. اخر شي رحنا لتركيا و من تركيا عبرنا لليونان و بقيت باليونان ٤ سنوات … تعلمت يوناني و بنفس الوقت تعلمت ادخن هالمصيبة الي ما اعرف شلون اعوفها …
و ورى اربع سنوات … هم كدرت اجمع فلوس طلعتي لهنا … و جيت لهنا و هم رفض يشيلني و رفض يطبني و حالي من حالكم … ياهو الي اتعرف عليها تكلي عندك اوراق و تفلت .. و مره بطلت تدخين .. سنتين … و كلت خلي امشي عدل … و تعرفت على مرية … طبعا اجنبية مو عربية … عن طريق برنامج بالانترنت … تواعدت وياها وجتي .. هي اكبر مني بهواي بس كلت ميخالف المهم اخلص من الكامب و المشاكل و بنفس الوقت ما اتذكر التدخين … لان بالكامب هواي يدخنون … و قبلت بالعلاقة و كالتلي عندي بنات تلاثة .. كلتلها عادي … اول مرة التقيت بيها بمطعم الماك دونالد … بوقتها هي اقتنعت بيا بسرعة … و اني هم اقتنعت بيها وطلعنا نفتر بسياراتها …
هي شغلها الاساسي سايق مال باص .. و كالتلي اريدك تجي تشوف بيتي و بناتي و اعرفك عليها كلقاء اولي … و رحت و التقيت بجهالها و حبيتهم لان خطية صغار … و سكنت وياها ورى اسبوع … طبعا هي جبيرة بالعمر و عمر سنين العمر مجانت عيب … بس هي جانت يوم ورى يوم احس بيها تستقوى عليا … يعني مره تصيح و وراها تعتذر … مره تكلي لا تفتح مي البوري هواي من تسبح ترى هنا مو كامب … و عدها مشكلة بالنوم جانت … من جنا ننام سوى بس اتحرك اي حركه تفز … اخر شي كالتلي اكلك اني داشتغل و انته حاليا كاعد من الشغل … ليش متنام بفراش و اني بفراش لان اني لازم اكعد من وكت و من وراك دافز هواي … كلتلها ماشي و بصراحة كيفت … كمت انام جوى و ابقى اسهر عالكمبيوتر … و فد يوم اني نايم جوى و هي فوك و جانت الدنيا عبارة عن قطعة بيضه … ثلج … اذا افتح باب المطبخ يفوت الثلج جوى و اذا امشي تطمس رجلي … المهم اني كاعد جوى داباع مسلسل وهالحجي سنة ونص عابرة على علاقتي بيها و جنت ماخذ طرد من الكامب … يعني الاسبوعية ماعندي … و مكان ماعندي … جان تنزل من فوك .. كالت اني اريد انهي العلاقة … كلتلها ليش … كالت اني تعبت .. اني اريد واحد يشتغل و يساعدني … و انته ماكو شغله تطول بيها … و اوراق ماعندك … تعبت اني من علاقتي بيك يله كوم اطلع برى … ساعة ٤ بليل … بالاربعة تكلي كوم اطلع برى … كمت لميت هدومي علاكتين و طلعت …
طلعت ماعرف وين اروح .. وين اولي ؟؟؟ هي جانت يوميا من تطلع من البيت .. تطلع بسيارتها الشخصية و توصل للكراج الرئيسي الي بي الباصات و تاخذ الباص الي تسوقه … طريقها حصرا مقابيل منطقة الباص ..
رحت كعدت بالمنطقة مال الباص و كلت بلكي من تفوت منا تجي تعتذر وتكلي تعال اني اسفة … هالحجي هي تطلع بالخمسة ونص … و بقيت كاعد و افرك بجسمي و كمت اطلع هدوم من العلاليك اعبيها بالقمصلة الي لابسها … بحيث قمصلتي انفخت لان بس اريد اسوي حراره بجسمي … و طبعا باصات ماكو لحد سته صبح … و مشى الوكت و صارت بالخمسة ونص و جان تفوت تمشي على كيفها لان الشوارع ثلج .. من شفت سيارتها من بعيد كيفت .. جان توصل يمي و تباوع عليا و عبرتني ومشت … بوقتها ابيع كليه من كلياتي و ابوس رجلين و ايدين و تراب رجل الي يجيبلي جكارة حشيش حتى لو بيها نفسين .. لو بيها نفس قابل .. و صار الصبح و ركبت باص و جيت للكمب و عبرتوني من السياج المكصوص اذا تتذكرون بس بوقتها محجيتلكم القصة و اذا تتذكرون كلتلهم جنت يم حسام الحلاق كاعد و صارت مشكلة .. بس جذب اني جنت يمها … كلتله صح اتذكر .. كال و بعدين كامت تخابر و تتوسل … و الجهال يحجون وياي و يبجون … و اني ما ردت اثقل عليكم لان اعرف وضعكم و اعرف كل شوية الرسبشن كامزين عليكم … قبلت ارجع .. قبلت ارجع و اني اعرف هي ليش سوت وياي علاقة .. هي رادت رجال .. و رادت واحد يشتغللها سوالف البيت .. و الاهم من كل شي رادت واحد يداري هالجهال بوقت شغلها و دوامها بمكان متدفع اقل شي ٣٠ يورو يوميا لشخص يجي يكعد يمهم من الصبح لليل .. و لكت بيا الكوكتيل كله .. و قررت ارجع بس علمود من يرجعنني للكمب المحامي اعوفها اني …
و رجعت و طبعا هي و الجهال جتي تاخذني … و جتي اخذتني و رجعت … و ما عبر على رجعتي شهرين … جان يتصل بيا المحامي كالي ارجع للكامب رجعتك … طبعا بيومها شسويت .. ساعة بالعشرة هي تغط بالنوم … كمت صعدت للغرفة و جان افتح الكلوب و كلتلها اهووو اسف حبيبتي فززتج .. جان تكول عادي .. و رجعت نزلت جوى … وراها بربع ساعة وكفت عالدرج و جنت اتسنط .. طبعا هي تشوخر … من سمعتها غطت بالنوم رجعت صعدت فوك بس هالمرة وكفت يم الكنتور جان اجر جنطه من فوك الكنتور و وكعت بالكاع طبببببببببببب … جان تفز كالت شكوووو … كلتلها اسف حبيبتي والله ممتقصد جان تكول عادي و طبعا هالحجي ثاني يوم وراها شغل … و رجعت طلعت برى .. و هم انتظرت اسمع شخيرها و سمعته … و جان افوت و شغلت نغمة التلفون مالتي عالية و جان تفز … عيطت كالت شكوووو مداكدر انام شبيك .. رحت بستها من راسها كلتلها اعتذر حبيبتي … و هم طلعت برى و هم رجعت نامت جان افوت و فتحت الشباك مال غرفتها على كيفي و جان اسده قوي …. جان تفز و كامت على حيلها من الفراش … كالت شبيك … كلتلها تدرين بروحج انتي مو زينه وكلش سيئه .. كالت شبيك شدتحجي … كلتلها تتذكرين من طلعتيني ساعة ٤ الصبح بالثلج … كالت اي ؟ كلتلها كلتي ماريدك صح … كالت هذا شي قديم واني احبك … كلتلها انتي متحبيني انتي تريدين واحد يداري الاطفال و مجرد رجال بالبيت شوكت متحتاجي تصيحي و بس .. كالت وانته ماعندك مكان و هم لكيت هنا مكان … كلتلها صح … بس من فتت هنا اول مرة حسيت صرت واحد من البيت و حبيت الجهال … وحتى انتي رغم فارق السن حبيتج ..
بس يوم ورى يوم جنت اعرف انتي تريدين بهل الشكل لا اكثر و لا اقل و عالعموم يله هالمره اني اكلج ماريدج … و للموت مراح انسى ذاك اليوم الي افرك بي جسمي و انتي فتي بسيارتج شفتيني و طلعتي كبل … و جريت غراضي و طلعت وهي تبجي و كعدت الجهال وهم يبجون … و عفتها و رجعت للكمب .. و بنفس اليوم الي فتت بي للكمب جبت حشيش بخمسين يورو بحيث شربت لحد ما دخلت بشغلة اسمها اوفر دوز … و حسيت بروحي تافه و حياتي عبارة عن خيسة بخيسة (مكرم القارئ) .. و بقيت اصادق هاي و اصادق ذيج و ادخن و تعرفت على وجوهكم الفكر … و ضحكنا كلنا … و السايق ضحك ويانه و هو ممفتهم احنا على شنو دنضحك اصلا … الهم وراها كال دقيقة نسيت شي … هو الشي يضحك … كال مو جنت بعلاقة وياها هاي ام الباص … من جنت عايش يمها .. مره اجه واحد هولندي للبيت .. سالتها هذا منو كالت اخوية بس عايش بغير دولة … و وراها بفترة اجه واحد بس شكله مو اوربي .. اسيوي .. ضخم و معضل .. كلتلها هذا منو .. كالت هذا اخوية بس من امي .. لان امي جان عدها علاقة بواحد اسيوي و هو عايش هنا بس بغير محافظة .. طبعا يجون يكعدون و يسلمون عالجهال و ينطوهم فلوس مثلا خمسة يورو لو عشرة يورو و يشربون كوفي و يروحون .. و مرة واحد مصري بس ميحجي عربي … هم كالت هذا كرايبي لان خالتي جانت وي علاقة بمصري .. الحاصل … ورى ما انتهت العلاقة بسنتين .. الجهال خابروني لان اشتاقولي .. و هي حجت وياي .. و مره جنت قريب على بيتهم و كالت تعال الجهال يريدون يشوفوك .. بس ترى عندي صديق افغاني … كدامه كلت انته اخوية من امي ماشي ..
طبعا ضحكت ضحك مضاحكه بحياتي … لان عرفت الرياجيل الي جانو يجون للبيت واني عبالي اخوتها هم جانو فاتورة قديمة ههههههههههههههههه .. و طبعا وراها ما كمت اهتهم .. الي يفوت بحياتي هلا بي و الي يطلع هم هلا بي … كلناله زين وابوك … كال ابوية تزوج الثالثة … وامي توفت .. بس هو عايش .. كلناله ندري بوفاة امك الف رحمه على روحها … كال اني العراق جان عندي بي امي وبس .. و امي راحت .. خلص ماظل عندي بي احد … و حسيناه اختنك و سدينه الموضوع و طبكنا يم بانزين خانة ناكل شي و نفوت حمام (مكرم القارئ) … البانزين خانات هنا تختلف عن العراق .. هنا البانزين خانه كل شي بيها حتى العاب مال اطفال … احنا كعدنا نشرب كهوة و السايق ديحط غاز لسيارته … لان سيارته غاز .. و اني و امجد جوى و سعد كالعادة لازم يطير .. ورث صاروخ و وكف برى بعيد عن البانزين خانه يدخن … و دنيا راحت للحمام و طلعت .. تأخرت و شفناها واكفة كبال ملاعيب الجهال .. امجد بوقتها اشرلي بعيونه .. درت وجهي شفتها صافنه على ملاعيب الجهال .. كلتله اكلك انته مسامع قصة دنيا ..
كال لا والله استحي اسألها و هي اصلا متحجي بس الي تريد تكوله .. كلتله هي كايلتلي مقتطفات .. كال كافي جتي .. جان تجي و خطية شكلها مقهورة .. كلتلها ها شبيج كالت ماكو شي .. شربت كهوة و احنا هم شربنا و اكلنه شغلات بسيطة و كمنا صعدنا بالسيارة .. بالسيارة دنيا كالت لسعد .. من تدخن هالشي تنسى كل شي لو اشياء و اشياء … كالها هالجكارة متخليني اكدر الزم الافكار .. يعني مثلا اذا اريد اجمع افكار براسي ماكدر اجمعها .. و حتى لو تتجمع تكون تجميعة مضحكه .. كالت تدرون اني اكره الجكاير كلش .. كلتلها اكيد من ريحتها .. كالت لا والله .. كلتلها لعد علمود الصحه .. كالت لا … كلتلها هاي شطلعت لعد علمود الحلال و الحرام و اذية النفس .. كالت جان يجيوني من تصير عركة .. سعد كالها منو ؟ ابوج .. كالت لا ابوية ميت و مشايفته لان جان عمري ٣ سنوات .. ما اتذكره .. و امي جانت لا حول و لا قوة ..و ام على اربع بنات اني اصغرهم .. و كلنا كاعدين ببيت خالي الي هو هم امكانيته على كده .. و احنا خمس نفرات .. اكل شرب لبس .. اضافه لهل الشي هو عنده عائلة و بنات و ولد .. و البيت كله ستين متره .. خالي جان امنيته يزوجنا .. و جانت الي توصل ١٥ تتزوج ركض .. لحد ما وصل سرايا .. جنت اتخيل نفسي اني و خواتي مثل الصخول او الخرفان .. يكبرنا و يسوي بينا شوية لحمه و ينطينا للكصاب .. عاد الكصاب يطلع زين .. يذبحنا على كيفه و ميخلينا نحس .. بس اذا طلع مو زين .. يذبحنا بسجينه عميه … واني نصيبي جان السجينه العميه … جنت طفله .. بحيث العب وي بنت اخوه الجبير .. نلعب توكي فوك السطح .. كبي نو .. كبي نو .. بس مجان يعجبه الحال و يكتلني .. جان سادي .. طبعا بذاك الوقت اني ماعرف شنو سادي .. بس من سافرت و عشت وحدي و كمت اقرا عالانترنت عرفت هو سادي .. جان يتلذذ بوجعي .. يجويني بمكانات بجتفي و بزنودي .. مكانات من البس دشداشة تتغطى .. حتى ميشوفون الجويات اهله و يسألون و ياويلي اذا احجي لأحد … وفوكاها طلع ميصير عنده جهال …
مرات احس هاي الله سوى هيج حتى ميخلف من عندي … لان يمكن لو مخلف مني جان اذاهم للجهال … و جان يا ليلي و سواد ليلي اذا ينفتح موضوع جهال من واحد من اخوته لو اهله .. يعني همه يسألوه ليش متسوي جهال لو شوكت تسويلك طفل وهو يطلع قهر الله بيا … جنت اتحمل لان المن اروح ؟؟
وين انطي وجهي .. و اصلا بالمناسبة تعلمت عالكتل .. يعني كلش طبيعي الي جان يصير وياي … بالبداية جنت اتاذى و ابجي و الليل كله انتظرة ينام حتى ابجي براحتي لان ميقبل ابجي واني يمه … ميكدر ينام مثل صديقتك سعد .. بس الفرق هو جان يكتلني و انته جانت تنزلك جوى .. شفت الفرق .. و تعلمت .. تدمغت …
و مشت السنين و انباع بيتهم و جنت اتمنى مينباع حتى يوزعون الحصص لان اعرف راح اكعد وياه وحدي … و جان هالتفكير مسويلي رعب .. و ماعرف شلون الله طلع براسه فكرة السفر … كيفت .. كلت حيطلع و يعوفني .. بس وين يعوفني ؟؟
هالحجي اني امي ماتت و الحمدلله اخر ايامها جانت عايشة ببيت اختي الجبيرة ورجل اختي زين بصراحة .. يعني ماعندي مكان و خواتي هم صعبة اروح يمهن لان محتارات بروحهن وبجهالهن .. و هو هيج من الله كال تطلعين وياي …
نروح سوى للخارج و هناك يجوز اكو حل .. و طلعنا … لتركيا و من تركيا لليونان و وصولا لهنا ..و هنا لا راجعنا مستشفيات و لا رحنا و لا شي … اشو كعدنا بالبيت و هو كضاها ببس سهرات و طلعات و انوب كام يعوفني هنا اسبوع كامل و اني وحدي بالشقة .. واني اول وتالي بنية … وفوكاها ميعلمني لغة و لا يدخلني مدرسة و يكلي من يسألوج كولي الهم ماريد اتعلم و ما افتهم .. لان اللغة هنا اختياري … و بقيت هيج لحد ما فد يوم اجه للبيت و كالي حروح شهر وارجع .. كلتله وين ياشهر .. يمعود اني اخاف و ترى حتى مسواك مدا اتسوك … لان ما اعرف لغة … كالي لاتطوليها و انلصمي و سوي الي اكلج عليه .. وضربني لان لحيت على بقائه .. و ضربه ضربتين اربعه .. و جوي الناس و سجنوه و اليا عزلوني بكامب مطلقات … و طبعا هالحجي كله و اني و هو ماعدنا اقامة .. جان مأجر شقة بالاسود … و بعدين انقلت من كامب لكامب .. و طبعا هم رفوضات .. و مرة شفتك صدفه او انته شفتني و انته كل عقلك اني جديدة .. بس اني جنت جايه اغير هويتي وبس و جنت خايفة لا اشوفه صدفه لان حلف وين ميشوفني يكتلني .. و حتى لو ينعدم .. طبعا هو عافني علمود النسوان الاجنبيات .. و هو وربه يتجازى … و هاي سنين العمر مرت .. طبعا اني اريد الاوراق بس علمود اكدر اسافر و ارجع .. اسافر اشوف خواتي وبس .. و اروح لكبر امي و ابوية .. هذا كل همي والله ..
وسالفة ارجع للعراق واني هيج هم راح ارجع واكول .. ووووووين اولي ؟؟ وين اروح ؟؟؟؟ منو يتحملني ؟؟؟
منووو .. و طبعا دنيا كامت تبجي و سكتناها و حاولت اضحكها اكلها صدك تنكط فكر هههههه .. كامت تضحك و سكتنا .. و باوعنه على امجد الوحيد الي محاجيلنه شي مباشر عنه .. جان دائما يحجي تفاصيل صغيرة …
عالعموم .. قبل ميحجي شي .. كلتله اخاف تكول انته ما حجيت .. انتو تعرفون كل شي عليا .. من سالفة بنت عمتي لسارة انتهاء بكاروو الله يرحمها … و اذا على سالفة العراق و وضعي المادي .. هم حاجيلكم .. بس انته ما كلت شنو الي جابك هنا .. و شنو صار وياك على مر السنين و فوكاها انته قديم .. كال ميفيد الحجي والله .. يعني هسه اذا حجيت و اذا محجيت شراح يصير .. راح يتغير شي ؟؟
كلناله لا بس عادي دنسولف .. كال والله والله والله .. قصتي متجي بصف قصصكم و توكف .. انتو مريتو بسوالف هواي و تأذيتو .. اني متأذيت .. اني جان عندي حلم و الحلم متحقق .. كلناله شنو حلمك ؟؟
كال يعني اطلع اسافر لهنا اخذ جنسية و افتر العالم وما اخلي دولة تعتب عليا … كلناله بس .. كال و الله من طلعت من العراق هذا حلمي جان .. بس من وصلت لهنا صار حلمي الوحيد هو العائلة … كمت احلم بالعائلة .. بالمناسبة اني ماعندي احد بالعراق .. امي و ابوية متوفين .. و اخوتي ثنين بتركيا عايشين و وحده بعمان هي و زوجها .. و هالحجي قديم يعني مو هسه .. اني الوحيد الي جنت بالعراق علمود امي … لان هي ابد معافت العراق .. من توفت امي اني كبل طلعت .. وبعنا البيت الباقي بالعراق و وزعنا الحصص بالتساوي و اني بفلوس حصتي جيت لهنا … و هاي مرات اشتغل ومرات اكعد .. بس مو مثلكم ابد .. انتو مبين متأذين .. كلتله تدري اني اول مرة من جيت للكمب و التقيت بيك ..كلت هذا الدنيا شمسويه بي و شصاير بي … كالي ياخوية لا ترجعني بالزمن .. كلتله ماشي و سكتت … ونمنا كلنا .. و بس السايق يسوق و طبعا جنا نفز و بكل فزة نصيح دنيا .. و تفز دنيا تكول ها .. نكلها خو مابيج شي هههههه .. اخر شي ضاجت كالت متكوليلي كل شوية دنيا دنيا و كل متفزون .. شنو تحلمون بيا .. كلنالها لا مو بس انتي بنية ويانه ههههههههههه .. ضحكت خطية و وصلنا للنرويج … طبينا بمنطقة بيها محلين عربيات .. بس ما اعرف بالضبط عراقيين او جناسي ثانية .. و وكفت السيارة عادي و نزلنه و دخلنه ابو السيارة لعمارة و صعدنا فوك .. طبينا بشقة نظيفة كلش و مرتبه .. و كال هنا تنتظرون وراح … كعدنا بالشقة و بدينا نسولف و اهم شي جان عدنا نشرب كهوه او كوفي مثل ميكولون .. سوينا كوفي و سعد طلع بالبالكونه يدخن لان المكان مغلق و اذا دخن يمنا نسكر سكره جماعية .. و شربنا الكهوه و بقينا ننتظر الرجال .. الي هو اخو المهرب علساس ..
او بالاحرى اخو القبطان ..
الي صار طلعنا تمشينا .. لان اصلا احنا منخاف و حتى لو ننلزم طززز (مكرم القارئ) يعني شيسولونه ؟؟ يرحلونه لنفس الدولة الي جينا منها هاي اقصى شي يصير .. و طبعا احنا اصلا قبل هالجيه هنا .. جايين و كل شي تمام .. هنا التنقل من دولة لدولة مابي اي مشكلة بس اهم شي التكت يكون رسمي .. المهم طلعنه تمشينا و جبنا شغلات هيج مال كعده .. مثلا جبس و كرزات و بطل كولا .. و بهل الحجي اجه اخوه … كعد يمنا و الولد جان محترم و مرتب … واحنا جنا محترمين بالحديث .. لحد جملة طلعت من لسانه طار الاحترام .. الجملة كال نص الفلوس مقدما ..
من كال هيج اني كمت على كيفي بحركات مدروسة قفلت باب الشقة … و كلت لدنيا روحي للغرفة الثانية كعدي بدون زحمه .. كامت راحت للغرفة الثانية .. سدينا باب الصالة و سدينا باب البالكونه .. و سعد رأسا افتهم الفلم .. كعدنا اني على اليمين و سعد عاليسار و بنصنا اخو المهرب … و امجد كاعد كبالنه … كلتله دير وجهك عليا .. كال ها .. كلتله شوف .. شفت البنية الي فوتناها للغرفة .. كال اي .. كلتله عرفت ليش دزيناها للغرفة ؟ كال لا .. كلتله لان راح تسمع من عدنا انواع المسبات و الشتائم بالعراقي و بالنرويجي و بالهندي و بالروسي هم … كلتله شوف .. اربعتنا مرفوضين و جايينك من كمبات مختلفة .. و قبل ما نجي لهنا .. مو للنرويج قبل منجي لاوربا .. جان عدنا تاريخ شامل و جايف (مكرم القارئ) وي القفاصة … و انته تعرف مثل ما الاخ امجد يعرف و درت وجهي على امجد كلتله انته تعرف مو .. كال نعم نعم اعرف .. و باوعت على سعد كلتله و الاخ سعد يعرف و هم باوعت عليه .. كلتله انته تعرف .. كال نعم نعم اعرف .. كلتله انته تعرف مثل ما نحن نعرف و طبعا هالحجي بالفصحى احجي من باب التصنيف على الوضع الي ديصير .. كلتله انته تعرف مثل ما نحن نعرف اي مهرب بالدنيا اذا كال نص الفلوس مقدما معناها السالفة تقفيص .. و اصلا احنا جينا هنا على مبدا .. الدفع عالوصول .. و اذا .. هاااا .. واذا عبالك احنا جينا و انحصرنا .. فاحنا مرفوضين .. و ياريت لو تجي الشرطة هسه تودينا للمركز و من المركز يرحلونه لنفس الدوله الي جينا بيها .. وهاي اقصى شي يكدرون يسوونه ويانه .. و ياريت .. شايف شكد حلو من الدولة تاخذك على جفوف الراحه و حرس وياك و يردونك منين ما اجيت .. شعور يخبل .. بس هسه نجي الك .. انته مبين متجنس .. و وضعك هنا زين .. شنو رايك هسه نكوم نكسر الشقة قطعه قطعه .. و نصيح و نجيب البنية الي فاتت للغرفة .. حتى اولا تتهمك بالتعدي عليها و بنفس الوقت انته جبتنا هنا حتى تهربنا للاستراليا .. يا مهرب .. و هالشي احنا اربعه نشهد بي ..
و شوف شراح يسوولك الدولة هنا .. و الاحلى بعد انو انته تضيع .. بس احنا يرجعونا على كفوف الراحه .. عندك حل واحد .. حتى تخلص من كل هالحجي وديربالك تفكر اصلا تكول غيره او تحاول تتناقش ويانه بغيره .. الحل نفس السيارة الي جابتنا ترجعنا منين ما اخذتنا .. بس وياها الف يورو .. كول ليش .. بس اسالني ليش .. بشرفك اسالني ليش … كال ليش .. كلتله هيج خاوه على شاربك .. كال ماشي و طلع من جيبه الف و انطانه و اتصل على الولد المغربي .. صعدنا وياه كلنه و رجعنا وياه .. الطريق كله نضحك رجعنا .. عبالك جنا سفرة و متونسين .. و كل شوية سعد يكول لا وبعد فلان .. كلتله منو فلان .. كال الي عرفني عليه و كالي الفلوس كلها عالوصول .. كلتله لا ترى الولد ماله شغله .. الخلل بهذا الي هنا .. و بالالف يورو اكلنا بالطريق و رجعنا …
رجعنا لنفس المكان الي اخذنا منه .. و نزلنه … كعدنا نضحك على نفسنا و كلتلهم ترى والله احنا فقرا و على نياتنه .. طول عمرنا نسمع عن مثل يكول .. الكتاب مبين من عنوانه .. معقولة كل هالسنين من ظروفنا ما عرفنا شنو مضمون العيشه الي احنا بيها و عبالنه راح ترهم و نسافر ههههه … كالو والله صدك .. كلتلهم خلص احنا حالنا حال الي وصل للعمر نهايته .. و اجاه الموت .. يفتح ايده و يسلم نفسه بعد شكو نقنع نفسنا راح نعبر لو راح ناخذ اوراق .. يله كل واحد منكم يرجع لهمه و لغمه و لعيشته هههه .. و رجعنا صدك كل واحد لوضعه .. و مرت اكثر من سنه و بعدين فجاه .. كلنا بنفس الوقت رجعولنه الاوراق .. هيج صدفه مشايف .. كلنا العابرين عشر سنوات و مرفوضين .. انطونه اوراق سوية ..
بذاك اليوم واحد خابر الثاني .. و التقينا بمطعم عراقي .. اربعتنا .. اني الطريق كله كلت راح اروح اشوف الفرحه بعيونهم .. بس من رحت و التقينا كلنا و اجتمعنا .. شفنا ابتسامات بس مو ذيج الفرحه الفرحه .. و من سعد كال اشو ما بيها طعم .. طبعا ما بيها طعم .. كل واحد بينا خسر ناس و خسر حب و خسر و خسر و خسر .. و خسر عمره الي ميتعوض اصلا .. خسرنا احلى فترة بحياتنه .. العشرينات … خسرناها اربعتنا … و اصلا احنا جايين خسرانين .. و خسارة فوك خسارة .. المهم نكول خلص .. خلصنا و طلعنا لبيوت .. و خلص بعد ..
لازم نضحك … كافي حزن .. يله خلي نعيش عدل .. طبعا دنيا حصلت عقد عمل .. و تزوجت واحد مرفوض حتى تساعده بتحصيل الاوراق … و سعد مونس نفسه .. يشتغل و مكضيها سفرات .. امجد راح خطب وحده تعرف عليها بالنت .. عايشه بعمان …
و اني .. اني حتى الفرحه الصغيرة متكمل وياي .. ورى ما انطوني الاوراق بشهر او اقل الشهر امي ماتت .. يعني ماعرف شحجي .. عبالك الشغلة جانت موقته .. فرحة مقابيلها موت .. فرحت امي ماتت .. امي راحت .. يا ناس امي ماتت تعرفون اني شداحجي .. امي راحت خلص .. من راحت امي خلص .. هنا اني ختمت كل شي .. بعد اذا اذا الي نيه افرح بشي .. بعد مترهم الفرحه ..
خلص قفلت .. عبالك الحزن راهم وياي رهوم … عبالك مكتوب عليا من جيت للدنيا هالرجال حياته عبارة عن بجي .. عن حزن .. عن خسارات متتالية .. وهيج صار بالضبط .. و كعدت بالشقة انوب المصيبة هنا اني وحدي .. قبل جنت بنص ناس اذا يصير شي احجي وياهم … هسه وحدي .. صح جوني الشباب و دنيا جتي و رجلها .. بس بالنهاية كل واحد عنده حياته ويروح … واني كاعد بمكاني صافن … و قفلت بابي عليا وكعدت … شوية شوية كمت اروح ادور شغلات الهي نفسي بيها .. نادي رياضي .. دراسة .. سياقة .. و عايش يومي .. و حاليا اشوف اكو بنهاية النفق أمل .. لان بديت اتغير و احاول اتناسى كل الي صار .. ماكو واحد ينسى بس اكو شي اسمه اتناسى .. الي مريت بي اكو غيري مارين بلي اقسى منه و اصعب منه بس عاشو و كملو حياتهم .. ومن هالباب و من هالمنطلق اني لازم اعيش و اكمل حياتي … اكمل .. لازم اكمل ..

ملاحظة : اول و اخر مرة اكتب بشكل اجزاء .. لان الموضوع بي ابعاد اني في غنى عنها .. اني كلت و ارجع واكول اني ما اتعامل وي الاخوة و الاخوات بالصفحة بصفة ناس غرب .. اتعامل كأخوه .. و علمود هالشي .. من اليوم و صاعدا القصة شكد متصير طويلة .. انزلها مرة وحدة .. افضل الي و للجميع و اتمنالكم الصحة و السلامة للجميع ..
انتهى ..
نهاية
محطة روح

المصدر/ صفحة#ابوـبغداد