الأذن تعشق قبل العين احيانا

الاستاذ يشرح و الطلبة مركزين و القاعة هادئة و ما بيها اي صوت عالي غير صوت الاستاذ … فتحت الكتاب حتى اتابع كلام الاستاذ وي الكتاب و انتبهت صدفه على رقم الصفحة جوى لكيت رقم مكتوب … كلبت الورقة هم لكيت رقم بصف رقم الصفحة جوى … و ورى كم صفحة لكيت رقم و بصفه مكتوب اسم وسام صغير كلش … و بعدين كلبت كم ورقة مثلا ست ورقات ماكو ارقام و بعدين هم لكيت رقم بصف رقم الصفحة … و وراه بالصفحة الوراها هم رقم … حسبت الارقام سبعه .. بس مفرقات بسبع صفحات متتالية و بنهاية الرقم السابع اسم وسام صغيروني و طبعا هالشي مكرر من بداية الكتاب لنهايته … ضحكت و عرفت هذا رقم تلفون و طبعا بوقتها جان الرقم يخص بدالة البياع … و قبل اخر صفحة من الكتاب لكيت ذكرى كاتبها وسام و كاتب بصفها تاريخ الذكرى .. حسبتها لكيته متخرج صار سنتين و اذا ممتخرج معناها كاعد يعيد .. حجيت هالشي لصديقتي ضحكت كالت غير بطران .. كاتب رقمة بطريقة تضحك و بنفس الوقت كاتب اسمه بنهاية رقمه … معقولة طالب بكلية داوم و تخرج ما صادق لو دخل بعلاقة حب .. كلتلها شمدريني صدك بطران و رجعت للبيت ورى نهاية الدوام … بوقتها مجان اكو موبايل و جان عدنا ارضي … طبعا اني الوحيدة لأمي و ابوية .. وامي اصلا متستخدم التلفون هواي بس من تحجي وي خالاتي لو وي عماتي … و عدها كم رقم للجوارين مرات يتحاجون .. بس اني جنت استخدمه هواي و احجي وي صديقاتي بالكلية … ترددت اتصل و كلت خلي اتصل من باب الضحك بس اول شي انتظر صديقتي ميادة تجي يمي … ميادة جوارينه و صديقة الطفولة و كل شي اسوي احجي الها … جتي ميادة و حجيتلها كامت تضحك كالت هذا حاله حال الي يكتبون ارقامهم بالكوسترات و على الحياطين بس العجيب هذا طالب كلية … وانتي افتهمي بعد .. كلتلها شنو افتهم ! كالت يعني طالب كلية و تكولين متخرج على حساب فترة كتابة الذكرى و اذا ممتخرج معناها بعده بالكلية معقولة طالب بكلية ميكدر يصادق و كاعد يكتب رقمه بطريقة افلام اجنبية على ارقام الاوراق … اكيد هذا لو فطير كلش .. لو شكله مينطلع بي كلش … لو لوتي كلش و مسويها من باب الضحك وهسه هو الي راح يضحك عليج اذا خابرتي .. كلتلها دخلي نجرب .. كالت يله .. دكيت جان يجاوب رجال جبير .. سديته .. ميادة كالت اخاف هو هههههه كلتلها هذا صوته كلش جبير مستحيل هو .. و تعشينا و رجعت اتصلت ورى العشا .. ولد شاب جاوب كلتله وسام ؟
كال اي وسام … كلتله شلونك. شخبارك … كام يمت مت و هالشي أكدلي نظرية ميادة و طبعا ميادة لازكة اذنها بالسماعة وياي دتسمع و كل شوية تريد تضحك واني اخنزر عليها بعيوني حتى بس اسمعه … كال اني زين الحمدلله و انتي … كلتله بخير .. كال منو انتي .. كلتله اني وحده لكيت الرقم بكتابك .. جان يكول اي اي .. اني عايف الرقم و كلت الي يجمع الارقام اكيد راح يكون مهتم … جان تضحك بصوت عالي ميادة و اني استحيت و سديت التلفون بوجهه .. كلتلها ليش هيج ضحكتي .. كالت لج هذا غير فطير شنو الي يجمع الارقام معناها مهتم … بطران هذا و كامت تضحك .. ضحكت اني بس انقهرت عليه .. على الرغم اني ماعرفه ولا شايفته بس انقهرت لان ميه بالميه سمع صوت ضحكة ميادة و فوكاها سديت التلفون بوجهه … بقيت انتظر ميادة تروح و رجعت اتصلت عليه … كلتله اني اعتذر صديقتي جانت يمي و راح احجيلك الصدك .. اني حجيتلها و هي كالت اتصلي و جانت تسمع … كال عادي مصار شي و سألني عالدراسة شلونها .. كلتله ماشية .. و حجيتله على اشياء بالمنهج جانت صعبة و فهمني عليها و تعجبت من جان يعلمني بطريقة كلش سريعة و طلع كلش كلش ذكي … و عرفت هو ممتوظف و ديشتغل وي والده .. ابوه عنده مكتب مال نقليات بحافظ القاضي .. يعني عدهم سيارات تطلع لعمان و سوريا بذاك الوقت … و هو دائما بالمكتب وي والده … و يكول فلوس الشغل وي ابوية مستحيل احصلها بأي وظيفة .. و تقريبا كمت يوميا احجي وياه … الولد مودب .. و صريح بس صراحته تضحك … ميعرف يفتح مواضيع حياتيه طبيعيه … يعني مبين ماعنده تجارب … و صراحته حلوه و مو حلوه .. يعني يكلي اني كاتب رقمي على اكثر من كتاب ههههههه و بنفس الطريقة .. اني جنت بالبداية ماخذه الموضوع على شكل شي جديد بحياتي .. يعني مثلا فضول نكول او صداقة … بس اكثر من هالشي مستحيل … يعني مو مال حب و عاطفة .. بس يوم ورى يوم .. اشو كمت اشتاق للتلفون .. و انتظر ساعة ساعة الوضع يصير ملائم للاتصال حتى اتصل بي … و كمت اخابره على رقم البيت و المكتب .. و جنت اسمع شلون يتعامل وي الناس الي تجي تحجز لعمان و شلون يتعامل وي السواق و شلون ينزل سعر و شلون يحبوه الناس … طبعا حيرتني شخصيته كلش …
يعرف يحجي وي الرياجيل و يوصل يمي يكوم يخربط .. يعني ميعرف يفتح موضوع و اذا ابقى ساكته هو يسكت … هالشي جان يضوجني … و بس اكله فلان كتاب لو فلان شغلة ممفتهمتها عبالك كمبيوتر اكو براسه رأسا يشرح عبالك استاذ … و باقي المواضيع عن العلاقات يصفن … اني ماعرف ليش جنت حابه اسمع منه هيج كلام … و بنفس الوقت اكول مستحيل اكون حبيته .. هو مجرد صوت مشايفته اصلا … معقوله احد يحب صوت .. زين بله شفته و شكله ماعجبني .. و اني بصراحة و اعترف بذاك الوكت جنت حلوه و صغيرة و ادور مواصفات .. يعني اريد شاب وسيم لحيته خفيفه و شعره مو صفح لان جنت اتخبل من الشعر الصفح … و اهم شي اطول مني … لان اني طولي ١٨١ .. و الاهم بعد يكون شوية معضل مو كلش هواي .. هيج جنت اريد ارتبط … و المصيبة لكيت هيج واحد بالكلية و حاول وياي بس جان رغم كبر سنه و طالب كلية بس شخصيته محلوه … حجيت وياه اكثر من مرة و صارحني و بصراحة جنت مياله لشكله كلش .. بس اسلوبه يلعب النفس … مثلا ماعنده شي اسمه احترام للشكل … يصنف على اشكال الناس و هالشي اتخبل منه … اذا فاتت بنية سمينه يذبلي كلمة عود يريد يضحكني .. اذا اجه احد وكف يمنا و راح رأسا يكصه … و بنفس الوقت يتقرب هواي مني من يحجي و اني ما احب هيج شي ابدا (يعني جريء بس محلوه جرائته)… حسيت بي ملعب على مخربط و طبعا البنات جانو كلهم يباعون عليه و هو قبلي جان مصادق ثنين .. عفته مباشره .. و بوقتها جنت مستمره بالحجي وي وسام .. بس مكلتله على هالامور .. و من عفته لهذا الولد الي جان يشبه مواصفات الشخص الي اريد ارتبط بي .. تعاركت وي وسام .. كلتله انته شبيك متعرف تحجي و متعرف تفتح مواضيع … صارلي كومة احجي وياك .. و انته متعرف تحجي بمواضيع هواي .. و شاطر بس بالدراسة و الشغل و كالت البهبهان و حجت الجمسي .. اني شعليه بالبهبهان و الجمسي اني وحدة لكيت رقمك و ساعة السودة الي دكيت عليه .. ماعرف اصلا ليش يوميا اخابرك .. كالي يمكن لان نفس التخصص الدراسي .. من كال هيج ضحكت و سديت التلفون .. و لو يمي جان ضربته بالسماعه .. اني ضايجه منا و هذا ميعرف يحجي … رجعت خابرته لان هو ميعرف رقمي اصلا .. و بذاك الوكت جان الكاشف بعده منازل .. كلتله اي تصدك اني داحجي وياك لان نفس الاختصاص .. كال اني ماعرف احجي و ماعرف افتح مواضيع بس والله تعلمت عليج بيومي .. تعلمت احجي وياج .. و ما جنت متوقع احد يخابرني ..
كلتله راح اسألك سوال بس لا تفتهمه غلط … كال شنو … كلتله انته حسب ماسمعت منك بحياتك ممصادق بنية .. و دخلت كلية و طلعت منها و هم ممصادق .. مو ؟
كال اي .. كلتله شكلك يعني وجهك بي شي .. كال لا … كلتله زين جسمك بي شي .. كال زين سمعي .. احنا مو اصدقاء .. كلتله اي ؟
كال شنو رأيج نلتقي بالكلية .. اجي للكلية و نلتقي .. كلتله تعال … كال خلص باجر اني ساعة ١١ بالكافتريا و راح اكعد على ميز وحدي و ياهو الي يجي اكله الكراسي محجوزه و هسه يجون جماعتي ماشي .. كلتله ماشي و شلون راح تفوت .. كال طبعا يفوتوني لان راح اجي بحجة عندي معاملة و عندي متعلقات بالكلية .. كلتله زين .. وطبعا هالحجي ما حجيته لا لميادة و لا لتارة و لا لسارة … و هذولة اقرب صديقات بحياتي .. كلت اخاف يضحكون عليا لو يكولون مخبله شدسوين .. ردت امشي بهل الشي وحدي .. و انتظرت ساعة ساعة و ثاني يوم رحت للكافتريا .. الكافتريا متروسة طلاب .. الوجوه تقريبا كلهم اعرفهم بس اكو واحد كاعد على ميز وحدة .. صدمة عمري جانت .. كصير الولد كصير .. شكله كلش حلو بس كصير .. اني من اوكف بصفه يوصل لخشمي تقريبا … تخبلت و رحت كعدت و بقى يمتمت و صافن بوجهي .. و جنت بس اريده يروح لان عرفت هالعلاقة فاشلة .. و لان اعرف هو ميفتح مواضيع بقيت ساكته .. كالي شفتيني .. كلتله اي .. كال من اليوم راح تكطعين الاتصال بيا لو راح تتصلين ؟؟
كلتله ليش تكول هيج .. كال ماعرف .. كلتله لا بالعكس انته صديقي الي اشكيله همومي و الي يساعدني بالدراسة و الي يسمعني و الي يحجيلي عالشغل و عالناس .. جان يبتسم و كالي تاكلين شي .. كلتله لا .. كال تشربين شي .. كلتله لا .. كال زين .. و بقى ساكت بس يباوع عليا .. كلتله يله همزين شفتك ترى عندي محاضره كالي زين و كام طلع وياي هو راح من باب الكلية و اني دخلت للقسم .. بس شصار بيا .. الولد ميتعيب بس كصير .. و رجعت للبيت و الوقت كام ميمشي .. وكمت اقارن هسه ساعة عشره و يوميا هيج وقت اني احجي وي وسام .. الوقت وكف من صدك .. و كمت اقارن بينه و بين هذا الملعب الي يتقرب مني من يحجي .. و تمنيت لو شخصيته وسام بداخل جسم هالمخربط .. بس مترهم .. طبعا الفرق بيني و بينه بالعمر مو جبير … بس كصير .. خفت احجي لصديقاتي .. وعبر اول يوم ما اتصلت بي .. بس بالكوه مشى الوقت .. و مشى ثاني للنص و مكدرت بعد.. خابرته .. جان يكلي والله ممصدك تتصلين .. كلتله باع من هسه .. اني اخابرك احجي وياك اي .. صديقي اي .. بس لا اكثر و لا اقل .. كال ليش هو هذا الشي اصلا جان هيج .. شنو الي تغير .. كلتله اي يعني لا تتأمل بشي ورى ما تشاوفنه و حتى قبل منتشاوف …
كال اني اصلا ممفكر بشي و كلش حاب وجودج بحياتي وبس .. وماريد اكثر من هالشي … ومشت الايام و كمت اتعلق بي .. و كمت من اطلع بالشارع اشوف بنية و ولد يمشون و الولد اكصر من البنية اكيف .. و اكول عادي ترى .. حتى بالافلام الاجنبية لو العربية من اشوف البطل اقصر من البطلة اكيف … حبيته لوسام .. حبيته و هالشي مجنت متوقعته والله .. الموضوع كله بده بضحك و تجربة … بس انتهى بتعلق .. تعلقت بي .. و جنت كل ما اشوف لو اسمع تصرفات بعض الطلبة وي البنات احب وسام اكثر لان محترم كلش .. و كلتله احبك .. و هو كالي احبج .. ولو مكايلتله اني هالكلمة و الله العظيم ميكولها بعد عشر سنين .. و الرجل جان كلش جدي بالموضوع لدرجة نفس الشهر الي كلتله احبك جاب اهله و اجه .. طبعا من وافقت صديقاتي كلهم تعجبو … شلون تقبلين بي مو كلتي ما اتزوج واحد اكصر مني ولو سانتيم .. و ما سمعت حجي احد و تزوجت رجال .. يغار عليا و محترم و ميباع على اي بنية غيري و صارلي وياه عمر و سنين .. و لا يوم خلاني انام مقهورة مع العلم داشوف و اسمع بعيني صديقاتي و جواريني عدهم رياجيل ماذيهم .. و ينوموهم بدمعهم .. و جهالي مرتاحين و مدللين بس اكثر شي يضحك بعائلتنه .. البنات طالعات على ابوهم كصار بس ولدي عليا طوال … يعني ابني حاليا اطول من ابوه و ابوه من يريد يحاجي يكله اكعد لاتظل واكف اتعصب من اشوفك واكف ههههههههههههه .. يكعده يله يحاجي … و عايشة احلى عيشه والله يحفظلي وسام و جهالي .. و طبعا جنت اسمع المثل الي يكول (الاذن تعشق قبل العين احيانا) ما جنت اصدك .. بس ورى الي صار وياي .. صدكت كل حرف بهل المثل ..

المصدر / صفحة ابو بغداد